Top

PNTL klarifika razaun halo identifikasaun ba ‘Susar’

Logotipu PNTL. Imajen/Espesiál

DILI, 24 maiu 2024 (TATOLI) – Xefe Investigasaun Kriminál Departamentu Invetigasaun Kriminál (DIK), Inspetór Polísia, Mouzinho Correia, hateten, razaun PNTL bolu sidadaun Amaro da Costa ‘Susar’ mai hodi presta deklarasaun iha Departamentu Inevetigasaun Kriminál tanba audio ne’ebé mak nia halo no agora daudaun espalla iha rede sosiál iha motivu ameasa.

“Los duni, iha dia 23 maiu 2024 maizmenus 11:00 oras hanesan ne’e, ita bolu irmão Amaro da Costa ‘Susar’ mai halo identifikasaun, kerdizer polísia iha kompeténsia atu halo identifikasaun ba se de’it kuandu presiza. Entaun ita hotu hatene katak durante ne’e iha mós voice balun ne’ebé virál iha media sosiál ne’ebé mak sai polemika, tanba ne’e mak ita bolu irmão Susar mai halo justifikasaun,” Inspetór Polísia, Mouzinho Correia, hateten ba Jornalista sira iha Komandu Jerál PNTL Caicoli, sesta ne’e.

“Depende ita idak-idak nian interpretasaun mas polísia haree katak iha ameasa, tanba razaun ida-ne’e polísia bolu nia, hodi halo identifikasaun hodi husu nian justifikasaun tanba saida nia halo voice recording ida-ne’e,” Inspetór Polísia ne’e reforsa.

Autoridade polisiál ne’e dehan, durante prosesu identifikasaun sidadaun Amaro da Costa Susar koopera di’ak tanba nia hateten sai duni razaun tanba saida mak nia halo ida-ne’e

“Nia (Susar) momentu ne’e hateten sai hotu tanba sá mak nia halo audiu ne’e, mas ida ne’e ha’u labele fó sai iha tempu ida ne’e,” nia informa.

Komandante Mouzinho, hateten, parte PNTL seidauk bele haruka auto notisia Susar nian ba iha Ministériu Públiku tanba sei estuda.

“Lae ita sei estuda, tanba kazu sira hanesan ne’e depende ba ninian prosedimentu, depende ba keixa husi ema ne’ebé sai ofendidu ka ofendida. Kuandu ema ne’ebé nia temi iha audiu ne’e mak la ofende no la halo keixa fila fali hasoru irmão Susar durante loron 15 nia laran automatikamente prosesu ne’e ita taka ou arkiva,” nia konklui.

Jornalista: Natalino Costa  

Editór: Rafael Ximenes de A. Belo

 

Publisidade

Leave a Reply

Latest Post

error: Content is protected !!