PNTL detein grupu GAM na’in-sia tanba treinu ilegál

DILI, 28 maiu 2024 (TATOLI) – Komandante Polísia Nasionál Timor-Leste (PNTL), Munisípiu Dili, Superintendente Xefe Polísia, Orlando Gomes, dehan ekipa konjunta, kompostu hosi Departamentu Informasaun Polísia (DIP) Nasionál inklui munisípiu, J2, Unidade Falintil no Servisu Nasionál Intelijénsia (SNI), detein suspeitu na’in-sia tanba viola rezolusaun Governu 44/2023 kona-ba suspensaun ba atividade Grupu Arte Marsiál (GAM) no Grupu Arte Rituál (GAR) hodi hili treinu subar.

Suspeitu hirak ne’e, hosi Grupu Arte Marsiál Ikatan Kera Sakti (IKS) no halo atividade treinu ilegál iha area Manleuna, domingu, (26/5), foin lais, iha tuku 20:00. Hafoin komunidade sira innforma ba Polísia. Suspeitu sira ne’e ho inisiál JCJ, FC, GM, JD, AJ,  HC, SC, FC no PC.

Hafoin Komandu PNTL simu informasaun, orienta kedan ba parte patrollu, eskuadra Dom Alexo hamutuk ho servisu sekretu sira seluk hanesan (DIP) Nasionál, inklui Munisípiu, J2, Unidade Falintil no Servisu Nasionál Intelijénsia (SNI) lokaliza kedan suspeitu sira nia fatin, nune’e asegura kedan suspeitu na’in-sia iha lokál krime hodi lori kedan mai Komandu Dili submete ba prosesu investigasaun no kumpre oras 72 hodi submeter ba prosesu interogatóriu.

Nia dehan, membru GAM nain sia ne’ebé  agora dadaun detein ona iha sela Komandu PNTL Dili Ministeriu Públiku promove ho krime desovidensia tanba ita hatene katak rezolusaun Governu nian fó sai tiha ona katak suspende atividade treiu ba GAM no GAR  maibe sira kontinua nafatin treinu subar iha tempu kalan, tanba ne’e mak ita konsidera nee komete krime desovidensia.

“Ba oin Komandu PNTL Dili kontinua la tolera hahalok sira hanesan ne’e. Prontu asegura nafatin rezolusaun Governu nian hodi bandu GAM no GAR atu labele halo tán atividade ilegál sira”, Superintendente Xefe Polísia, Orlando Gomes, Orlando Gomes hateten ba Jornalista sira iha Komandu PNTTL Dili Caicoli, tersa ne’e.

Tanba ne’e, Komandu PNTL sei orienta nia servisu sekretu sira seluk hanesan SNI, DIP nasional, J2 sira atu apoiu komandu kuandu hetan grupu GAM no GAR  halo atividade treinu subar, autoridade seguransa sei ka’er  hodi prosesa tanba autoridade polísia ne’e atu asegura de’it rezolusaun Governu nian.

Orlando dehan suspeitu sira ne’e ne’ebé ekipa konjunta detein ne’e kompostu hosi membru na’in ualu no treinadór ida.

“Ita bolu ona sira nia responsavel IKS nian atu mai klarifika no ita mós koordena kedan Komisaun Reguladora Arte Marsiál hodi fó hateten situasaun ne’e ba KRAM hodi bele hare no aplika medida ne’ebé tuir KRAM nian”, nia haktuir.

Ekipa konjunta mós asegura atributu farda no lilin inklui manu ida ne’ebé suspeitu na’in-sia ne’e uza hodi treinu subar. Hirak ne’e mak sai evidensiaa ba PNTL hodi aprezenta ba Ministériu Públiku iha prosesu ne’e.

Jornalista: Natalino Costa

Editór : Zezito Silva