HEADLINE, SEGURANSA

PNTL detein suspeitu taa kanek na’in-rua iha ‘’Kampung Baru’’

PNTL detein suspeitu taa kanek na’in-rua iha ‘’Kampung Baru’’

Komandante Sup Xefe Munisípiu Dili, Orlando Gomes. Imajen Tatoli/Francisco Sony

DILI, 28 maiu 2024 (TATOLI) – Komandante Polísia Nasionál Timor-Leste (PNTL), Munisípiu Dili, Superintendente Xefe Polísia, Orlando Gomes, dehan PNTL detein suspeitu na’in-ida ho inisiál IC tanba taa ema na’in-rua iha Aldeia 04 Setembru Kampung Baru, Suku Comoro, Postu Administrativu Dom Aleixo, Muniipiu Dili, iha segunda (27/5).

Kazu ne’e akontese iha segunda (27/5) tuku 20:00 kalan ho motivu, katak bainhira vítima na’in-rua nudar tiun hosi labarik hosi Masquerinhas ba Kampung Baru ba suspeitu IC nia uma, atu foti sira-nia subriñu hodi lori fali hela iha uma Masquerinhas, tanba sira subriñnu atu tama fali eskola.

Suspeitu nia oan ne’e desde ki’ik-oan kedan hela ho nia inan no avo sira iha Masquerinhas, maibé tanba supeitu IC momentu bolu nia ba hela fali ho nia iha Kampung Baru. Vítima na’in rua ne’e ba suspeitu nia uma Kampung Baru atu bolu fali sira subrinu maibé suspeitu IC hanesan aman lakohi entrega nia oan ba sira no mosu dezentedimentu hosi ibun ba ibun, entaun suspeitu IC foti katana taa vítima na’in-rua.

Vítima ida, suspeitu taa iha kotuk laran no vítima ida seluk mak suspeitu IC ho katana taa iha parte ulun no matan fukun hodi rezulta ran sulin sai rai makas, no iha momentu ne’e suspeitu mós sai hosi nia uma mai hakilar iha liur, nune’e joven sira bairro laran sai mai baku lisuk tán vítima na’in-rua.

“Ho hahalok suspeitu nian ne’e, hafoin akontesimentu maluk patrollu Eskuadra Dom Aleixo simu informasaun hodi halo kedan intervensaun hodi detein kedan suspeitu iha fatin akontesimentu”, Superintendente Xefe Polísia, Orlando Gomes, hateten ba jornalista sira iha Komandu PNTTL Dili Caicoli, tersa ne’e.

Nia dehan, suspeitu ne’e submete ona ba prosesu investigasaun no polísia halo ona detensaun ba suspeitu IC hodi kumpre oras 72 molok aprezenta ba Tribunál.

“Suspeitu detein ona iha sela Komandu PNTL Dili, agora daudaun suspeitu ita detein iha ne’e hela hodi kumpre oras 72 depois mak ita foin submete ba Tribunál Judisiál Primeiru Instánsia Dili hodi tuir interogatóriu dahuluk”, nia relata.

Komandante ne’e hateten, suspeitu nia hahalok ne’e komete tentativa omesídiu no krime arma branka tanba uza katana hodi taa vítima sira.

“Tanba ne’e, ita mós asegura evidénsia sira, arma branka hanesan katana ne’ebé suspeitu uza hodi taa vítima sira, nune’e ita bele aprezenta ba Ministériu Públiku sai hanesan evidénsia iha suspeitu nia aktu ne’e”, nia  konklui.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!