JUSTISA, HEADLINE

Tribunál liberta arguidu 10 envolve treinu ilegál hosi sela detensaun

Tribunál liberta arguidu 10 envolve treinu ilegál hosi sela detensaun

Tribunal liberta arguidu nain sanulu ne'ebé envolve iha atividade GAM iha Manleuna foin lalais hosi sela Detensaun Komandu PNTL Dili. Foto Natalino Costa.

DILI, 31 maiu 2024 (TATOLI) – Tribunál Judisiál Primeiru Instánsia Dili (TJPID), iha sesta-feira ne’e, halo sumáriu ba arguido 10 ne’ebé autoridade seguransa detein tanba envolve iha atividade treinu ilegál iha área Manleuana Suku Manleuna, Postu Administrativu Dom Aleixo Munisípiu Dili iha domingu (26/5) foin lalais ne’e.

Arguidu sira ho naran inisiál hanesan JCJ, FC, GM, JD, AJ,  HC, SC, FC no PC no C.

Iha prosesu sumáriu, Juiz José de Araujo ne’ebé mak prezide prosesu ne’e, deside hodi liberta arguidu na’in-10 hosi sela detensaun, Komandu PNTL Dili.

Iha prosesu ne’e, Ministériu Públiku ne’ebé reprezenta hosi Prokuradór Renato Bere Nahac, promove arguidu na’in-10 ho krime prátika ezersísiu ilísitu ne’ebé previstu iha artigu 252 Kódigu Penál Timor-Leste. Tanba tuir Ministériu Públiku nia haree katak arguidu sira hatene hela katak Governu liuhosi rezolusaun númeru 48/2023 kona-ba suspensaun ba atividade treinu  Grupu Arte Marsiál (GAM) no Grupu Arte Rituál (GAR) maibé arguidu sira dezeovidese no  kontinua halo atividade treinu.

Arguidu hirak ne’e, uza direitu nonok enkuantu arguidu ho insiál C mak hili direitu koalia, tanba arguidu C mak nudar lideransa ka mestre (guru) ba arguidu na’in-sia seluk.

Arguidu C, deklara ba Tribunál katak momentu ne’e sira ho nia kolega hosi Grupu Arte Marsiál Kera Sakti na’in-ualu hamutuk ho nia, na’in-sia sira halo serimónia agradesimentu tanba antes ne’e hetan fi’ar hosi sidadaun ida atu kura sidadaun refere no sidadaun ne’e di’ak tanba ne’e mak sira halo agradesimentu.

“Ha’u hanesan sira-nia maun bo’ot momentu iha domingu (26/5), ami laos halo pengesahan ka fó treinu ema ruma, maibé ami halo acara sukuran ida tanba antes ne’e ami kura ema tanba ne’e ami hakarak halo acara sukuran ne’e”, Arguidu dehan iha sala julgamentu TJPID, sesta ne’e.

Nune’e mós sasin, Primeiru Serjentu, Alcino da Silva, fó mós nia depoimentu ba Tribunál hodi deklara katak momentu ne’e nia simu informasaun hosi servisu sekretu sira katak iha área Manleuana iha Grupu Arte Marsiál IKS halo atividede treinu. Tanba ne’e, hanesan autoridade seguransa kontatu polísia eskuadra Dom Aleixo hodi asegura kedan arguidu sira ne’e ho evidénsia sira hanesan atributu ne’ebé arguidu sira uza atividade ne’e inklui manu rua ne’ebé arguidu sira uza atu halo rituál.

Iha prosesu alegasaun ba arguidu sira, Ministériu Públiku liuhosi Prokuradór Bere Nahac, husu ba Tribunál atu aplika pena prizaun tinan rua no suspende ba tinan tolu.

Tanba tuir Ministériu Públiku nia haree katak arguidu sira viola rezolusaun Governu ne’ebé halo ona suspensaun ba atividade arte marsiál no arte rituál maibé arguidu sira kontinua halo atividade treinu subar.

“Tanba ne’e Ministériu Públiku laiha dúvida hodi husu ba Tribunál atu aplika pena prizaun tinan rua ba arguidu sira no suspende ba tinan tolu”, nia dehan.

Renato Bere Nahac deklara ba Tribunál katak Ministériu Publiku mantein ho krime ne’ebé mak Ministériu Públiku promove ona ba arguidu sira.

Enkuantu Defensór hosi Arguidu sira, Fernado Lopes husu ba Tribunál atu aplika de’it pena suspensaun ba nia kliente na’in-10 tanba momentu ne’ebá sira laos atu halo trinu subar.

Hafoin rona tiha parte hotu, Juiz Jose de Araujo ne’ebé preside deside kontinua prosesu sumáriu ne’e ba segunda (3/6) tuku 9:00 hodi hasai despaisu ikus ba arguidu sira.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!