iklan

JUSTISA, HEADLINE

PDHJ reune no husu tuir ai-moruk ‘’stock out’’

PDHJ reune no husu tuir ai-moruk ‘’stock out’’

Provedór Direitus Humanu no Justisa (PDHJ), Virgílio da Silva Guterres 'Lamukan’ halo Vizita no fiskalijasaun ba Hospital Nasional Guido Valadares ( HNGV). Iha hnvg, tersa (04/06). Imajen Tatoli /Egas Cristovão

DILI, 04 juñu 2024 (TATOLI) – Prevedór Direitus Humanus no Justisa (PDHJ) Vírgilio Guterres, halo enkontru ho dirijente Ospitál Nasionál Guidu Valadares (HNGV) hodi buka hatene sobre stock out.

“Prevedór deside mai iha ne’e hodi koalia ho Diretora Ezekutiva en-ezersísiu HNGV, liuhosi enkontru ida ohin ne’e ami koalia lubuk ida, husu informasaun kona-ba ai-moruk tanba iha informasaun katak iha stock out, ospitál ida-ne’e ba ai-miruk reazente ninian ne’e 13% mak stock out, depois ba ai-moruk kosumaves ninian iha 11% stock out”, Vírgilio Guterres, hateten ba jornalista sira hafoin halo tiha vizita iha HNGV, tersa ne’e.

Vírgilio dehan ho persentajen ida-ne’e halo PDHJ lamenta tanba hanesan ospitál bo’ot ida la devia ai-moruk nia stock out to’o fali pursentu 11.

“Ami bele dehan kuandu ai-moruk falta to’o 11%, ne’e situasaun preokupante, tanba ospitál nasionál ida labele falta ai-moruk. Entaun ida-ne’e mak preokupasaun ne’ebé halo ami to’o iha ne’e no sei koalia ho pesoál sira ne’ebé ke responsavél liuliu iha parte polítika ninian atu halo intervensaun imediata oinsá atu estabiliza situasaun ne’e”, nia adianta.

Guterres afirma, HNGV labele falta ai-moruk, ai-moruk tenke estavél, sé ai-moruk menus 5% ka to’o 11%, ne’e situasaun ida-ne’ebe ke grave.

Prevedór mós sei ba halo vizita iha Iinstitutu Nasionál Farmasia no Produtu Medikamentu hodi husu kona-ba tanba sa mak mosu stock out iha HNGV no prosesu aprovizionamentu ba ai-moruk.

“Ami mós sei ba hasoru malu ho ministra no vise ministra atu kolia iha nivél polítika hodi sira bele fó solusaun liga ho stock out iha ospitál nasionál, tanba bazeia ba prosesu averiguasaun ne’ebé ekipa PDHJ halo iha semana tolu liu, ne’ebé sira hakerek iha relatóriu prelimináriu ne’ebé ha’u simu katak ospitál nasionál iha duni stock out ba ai-moruk”, nia dehan.

PDHJ identifika tratamentu pasiente ospitál nasionál iha problema

Iha biban ne’e, Vírgilio Guterres, sublina katak atendimentu iha Ospitál Nasionál Guido Valaderes iha problema tanba pasiente balun toba iha areadór óspital tanba ne’e husu ba HNGV atu aumenta kama pasiente.

“Iha ne’e ba médiku sira sevisu oras ualu, semana ida sira servisu oras 40 no sira servisu fulan ida oras 174, atu nune’e ita-nia pasiente sira bele hetan tratamentu. Mas kondisaun sira ne’e di’ak ita-nia médiku sira bele mai iha ne’e, sé ai-moruk kontinua menus iha ne’e mediku sira labele halo buat ida”, nia dehan.

Nia dehan, iha HNGV totál kama ba pasiente iha 340-resin no dalaruma pasiente balun toba iha liur, entaun HNGV tenke iha kama estra.

Iha fatin hanesan, Diretora ezekutiva interinu HNGV, Sara Maria Filomena Xavier, rekoñese óspitál nasionál enfrenta situasaun stock out ba ai-moruk.

“Los duni hanesan ohin ita-nia Provedor Direitus Umanus Justisa hateten katak persentajen 13 ba medikamentu no pursentu 11 ba konsumaves”, nia dehan.

Maske ho situasaun ne’ebé HNGV enfrenta hela, maibé Diretora Ezekutiva interina HNGV ne’e, fundamenta katak HNGV iha jestaun rasik atu buka meius para atende ba pasiente.

“Ita iha orsamentu ne’ebé mak bele halo kompra emerjénsia ba ai-moruk ka ekipamentu konsumaves sira. Orsamentu ne’ebé mak preve ba kompra emerjensia ba ai-moruk ne’e ita iha  $100.000, ne’e sufisente”, nia afirma.

Nia esplika, HNGV antes ne’e kompra emerjénsia ba ai-moruk ka ekipamentu konsumaves sira ho Farmasia Istana Farmasia no mós ho Betesda.

“Bainhira iha ne’e ai-moruk stock out ona ita halo karta justifikasaun hodi dirije ba atu ita halo kompras diretamente”, nia adianta.

Diretora Ezekutiva HNGV rekoñese katak bainhira HNGV sofre stock out ba ai-moruk HNGV sei fó reseita ba pasiente hodi ba buka ai-moruk sira iha Farmasia sira, maibé ida-ne’e provizóriu.

“Iha duni pasiente ne’ebé mak lori reseita ba apotik hodi hola no konsumu ai-moruk, ne’e durante loron-tolu, kuandu ai-moruk iha bele bolu sira mai foti fila fali”, nia konklui.

Jornalista: Natalino Costa  

Editór : Zezito Silva

iklan
iklan

Leave a Reply

iklan
error: Content is protected !!