PNTL Baucau no autoridade lokál hahu koordena estabelese KSPA
BAUCAU, 03 juñu 2024 (TATOLI) – Komandu Polísia Nasionál Timor-Leste (PNTL) liuhusi Eskuadra Baucau Vila hamutuk ho autoridade postu hahu koordena establese Konsellu Segunda Postu Administrativu (KSPA).
Komandante Eskuadra Polísia Postu Baukau Vila, Inspetór Asistente Daniel da Costa Freitas, esplika, objetivu husi estabelese KSPA hanesan parte prevensaun konflitu entre joven sira iha komunidade no ezekusaun orden husi Ministériu Interiór (MI) ne’ebé mai kedas ho matadalan atu asegura estabilidade iha baze.
“Ita prodús Konsellu Seguransa Postu atu sai matadalan no lian ba Polísia ne’ebé serbisu iha eskuadra, ida-ne’e krime sei laiha tán iha Postu Baukau Vila,” Komandante Eskuadra Baucau Vila hateten iha Sentru Konvensaun Baucau (CCB, sigla Portugés), segunda ne’e.
PNTL hamutuk ho autoridade postu ohin realiza sorumutu liuhusi reuniaun nu’udar parte soe ideia oinsá hamutuk bele harii KSPA hodi apoiu serbisu seguransa nian iha Baucau.
Estrutura husi KSPA sei funsiona hanesan lian, matan no tilun ba parte seguransa liuhusi eskuadra Polísia sira nune’e halo prevensaun ba situasaun sira sei akontese tanba iha ona estrutura ki’ik iha baze, liuliu bele ajuda identifika molok polísia to’o.
Administradór Postu Baucau Vila, Aires de Fatima Correia, esplika, planu konsellu seguransa postu nee, inisiativu sira-ne’e maihusi autoridade postu no polísia eskuadra ne’ebé sei envolve estrutura hanesan juventude, veteranu no sosiedade sivíl nune’e bele kria pás no estabilidade iha Postu Baukau Vila.
“Ita bele tau hanoin hamutuk kria pás iha Baucau ne’e, labele hanesan ida pasadu, tanba ita hatene seguransa la’ós iha polísia nia liman deit, maibé seguransa iha ita idak-idak nia-aan rasik,” Aires Correia hateten.
Estrutura KSP funsiona, tuir planu sei halo sosializasaun ba komunidade iha baze molok aprezenta ba MI hodi hetan aprovasaun
“Govenu sei konkorda, tanba estabilidade ba ema hotu, nune’e husu atu apoiu hodi tún baze,” Aires akresenta.
PNTL rasik hahú atu reativa hikas estrutura tolu ne’ebé paradu iha tinan-2019 hanesan Konsellu Seguransa Munisipál (KSM lidera hosi Prezidente Autoridade no Vise mak Komandante PNTL Baucau.
Konsellu Seguransa Postu Administrativu (KSPA) lidera hosi administradór postu administrativu no vise hosi komandante eskuadra no Konsellu Seguransa Suku (KPK) lidera hosi xefe suku no vise hosi Ofisiál Polísia Suku (OPS).
Objetivu hosi reativa konsellu tolu refere tanba hakarak atu iha koordenasaun komunikasaun no komunika di’ak liután ho autoridade munisipál, postu no suku nune’e prevene situasaun iha Baucau.
Jornalista : Natalino Belo
Editór : Evaristo Soares Martins
