iklan

NASIONÁL, DILI, HEADLINE

PRADET kontinua fó asisténsia ba ema ho moras mentál

PRADET kontinua fó asisténsia ba ema ho moras mentál

Logotipu Pradet.

DILI, 04 juñu 2024 (TATOLI)– Koordenadór Fatin Hakmatek Dili, iha Organizasaun Psychosocial Recovery and Development In East Timor (PRADET), Manuel dos Santos, informa durante ne’e halo hela asisténsia ba sidadaun hirak ne’ebé sofre moras mentál, nune’e  balun konsege rekupera no balun sei iha prosesu tratamentu.

“Ami durante ne’e halo servisu oinsa fó asisténsia ba sidadaun ne’ebé ho moras mentál, violénsia bazeia ba jéneru, defende maluk sira ne’ebé vitima ba trafiku umanu  liuliu fasilita sira asesu fasilidade saúde atu hetan tratamentu, barak liu ami halo tratamentu ba maluk sira ne’ebé moras mentál,” Koordenadór ne’e katak ba jornalista sira iha Palásiu Governu, tersa ne’e.

Tuir dadus ne’ebé iha, hahú tinan 2012 to’o agora PRADET halo atendimentu ba sidadaun ho moras mentál, vitima trafiku umanu, violénsia bazeia ba jéneru na’in-1.080. Husi n’umeru ne’e maioria ema ho moras mentál.

“Moras mentál barak liu ami fó asisténsia hanesan, tratamentu espesifiku ba moras mentál, reabilitasaun, fó asisténsia ba sira oinsa bele asesu ba fasilidade saúde, halo referál ba sira husi área rurál mai simu tratamentu, halo mós re-integrasaun ba sira nia familia. Husi númeru ne’ebé iha pursentu uitoan mak konsege fila ba normal no ami entrega ona ba familia, balun ne’ebé seidauk ami sei esforsu nafatin oinsa sira bele fila-fali ba normal,” nia tenik.

Tratamentu espesifiku ba moras mentál husi PRADET mak fó akonsolamentu ba familia, autoridade lokál no komunidade oinsa bele respeita sidadaun hirak ne’e nia direitu, halo reabilitasaun edukasaun ba moras hirak ne’e oinsa bele hetan rekooperasaun.

PRADET halibur moras mentál sira iha Hospitál Nasionál Guido Valadares (HNGV) no daudaun ne’e muda ona Vila-Verde. Maske nune’e PRADET mós nafatin fó tratamentu primeira atensaun ba moras mentál hirak ne’ebé la’o hela iha dalan ninin.

“Sira ne’ebé la’os hela iha dalan ita fó nafatin tratamentu primeira atensaun ba sira, lori hela roupa, hahan, konsola ho sira, ko’alia mós ho sira nia familia atu koopera ho ami oinsa mak bele lori sira ba halo tratamentu iha fasilidade saúde,” nia hatete.

Hasoru ho Vise-PM ASSANAMI

Ho servisu ne’e, PRADET  hasoru malu ho Vise Primeiru Ministru no Ministru Koordenadór Asuntu Sosiál, Mariano Assanami Sabino, hodi relata servisu hotu, nune’e bele hetan apoiu ruma husi Governu.

“Ami mai hasoru malu ho Vise Primeiru Ministru atu relata de’it servisu ne’ebé durante ne’e ami halo, tanba Vise Primeiru Ministru ka’er ne’e haree mós ba asuntu sosiál ninian. Informasaun servisu ne’ebé ami relata bele sai hanesan informasaun advokativu oinsa Governu bele tau atensaun no investe mós orsamentu ruma hodi apoia ami nia servisu másimu liutan iha futuru,” nia katak.

Durante hasoru malu ho Vise Primeiru Ministru PRADET mós aprezenta ona planu  Governu bele haree espasu rai no orsamentu atubele konstroi fasilidade, aranja ekipamentu no tau rekursu espesialista barak, nune’e bele fó asistensia di’ak ba moras mentál sira.

“Planu ne’ebé ita hato’o ba Governu, ita hein de’it desizaun husi Governu, ami nafatin hala’o servisu ho kapasidade ne’ebé ami iha hodi tulun ita nia malu sira,” nia afirma.

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!