EKONOMIA, HEADLINE

Ministru Agrikultura lamenta ho prosesu konstrusaun ró komérsiu rua

Ministru Agrikultura lamenta ho prosesu konstrusaun ró komérsiu rua

Ministru Agrikultura, Pekuária, Peska no Floresta (MAPPF), Marcos da Cruz. Imajen Tatoli/Francisco Sony

DILI, 05 Juñu 2024 (TATOLI) – Ministru Agrikultura, Pekuária, Peska no Flresta (MAPPF), Marcos da Cruz, preokupa ho prosesu konstrusaun ba ró komérsiu rua ne’ebé to’o agora seidauk iha rezultadu, tanba ne’e nia husu ba Diresaun-Jerál Peska atu aselera prosesu ne’e hodi garante iha futuru bele utiliza ba nesesidade sira iha tasi Timór.

”Ha’u husu ba Diresaun Peska atu prosesu sosa ró ka hadi’a ró komérsiu rua ne’e tenke aselera ona, tanba ha’u haree prosesu ne’e demora tebes”, Marcos da Cruz dehan iha Comoro, ohin,

Ministru ne’e hatutan katak bainhira iha problema ruma ho dokumentu sira liga ba aprovizionamentu tenke iha esplikasaun, nune’e ministériu bele hatene hodi buka nia solusaun.

Governante ne’e salienta MAPPF prevee ona orsamentu ba akizisaun ró komérsiu foun rua, ne’ebé kada ho presu kuaze millaun $3-resin. “Tanba ne’e, hanesan ministru hakarak hatene prosesu sosa ró ne’e oinsá, nune’e buat hotu bele la’o ona hodi halo pagamentu”, realsa.

Iha sorin seluk, Diretór-Jerál Peska, Akikultura no Jestaun Rekursu Akuátiku, Celestino da Cunha Barreto, dehan prosesu akizisaun ró rua ne’e agora la’o hela no nia garante prosesu sira ne’e bele finaliza entre nivel ministeriá, MAPPF no Ajénsia Dezenvolvimentu Nasionál (ADN), nune’e bele hakat ona ba konkursu públiku.

“Agora iha buat rua mak ita presiza haree mak parte tékniku nian kona-ba BoQ ne’e rasik, tanba dezeñu ne’e realiza iha tinan tolu ona, depois ita mós sei hare sobre prosesu administrativu entre liña ministeriál”, Celestino Barreto esplika.

Diresaun-jerál kontinua halo esforsu atu prosesu ne’e bele halo lalais, maibé presiza haree mós ninia planta no kadernu enkargu sira ka BoQ. “Kuandu laiha revizaun orsamentu ba konstrusaun ró rua ne’ebé prevee antes ona, bele mantein tanba dezeñu sira ne’e elabora iha 2021. Agora, tinan tolu ona, maibé kuandu BoQ ne’e maka tenke iha revizaun, entaun ninia presu mós presiza iha revizaun”,dehan.

Nia promete katak tinan ida ne’e molok remata prosesu ba ró rua ne’e bele finaliza ona, signifika bele tama ona konkursu públiku.

Ministériu Agrikultura prevee orsamentu hodi konstrui ró peska rua ho objetivu atu halo kontrolu ba movimentu peska ilegál iha tasi Timór.

Notísia relevante: Orsamentu 2024, Governu sei prevé milliaun $5 kontrui ró peska rua

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!