BAUCAU, HEADLINE, MUNISÍPIU, SEGURANSA

Ema na’in-rua lakon vida iha Carabela tanba monu ho distánsia metru 38

Ema na’in-rua lakon vida iha Carabela tanba monu ho distánsia metru 38

Vítima JG ne'ebé lakon vida hafoin hetan asidente iha área Carabela, postu administrativu Vemasse no iha imajen ne’e iha hela Ospitál Eduardo Ximenes Baucau, kinta (06/06). Imajen Agência TATOLI/Natalino Belo.

BAUCAU, 06 juñu 2024 (TATOLI) – Asidente tráfegu ne’ebé akontese iha área Carabela, postu administrativu Vemasse, munisípiu Baucau monu ho distánsia metru 38 hodi rezulta vítima na’in-rua lakon vida no na’in-ida seluk kanek kmaan.

Vítima na’in-rua ne’ebé lakon vida ho inisiál JBG, idade tinan 31, kazadu husi suku Ossohuna, postu administrativu Baguia ne’ebé lakon vida tanba hetan pankada iha ulun raan maka’as nune’e hakotu iis tuir dalan bainhira ambulánsia evakua ba Ospitál Rejionál Eduardo Ximenes (HoREX, sigla portugés).

Vítima seluk, sexu feto, inisiál EdC, kazada ho idade 42 ne’ebé rejista nu’udar sidadaun husi suku Obrato, postu aministrativu Manatuto, munisípiu Manatuto ne’ebé mate fatin iha lokál akontesimentu tanba pankada iha ulun.

“Fatin akontesimentu husi estrada ba lokál asidente hamutuk metru 38, fatin naruk kle’an tebes. Ne’e motorista halai motorizada ho velosidade másimu,” Komandante Seksaun Tránzitu hosi PNTL Baucau, Inspetór Asistente Alfredo Ruak Therik hateten iha Vila Nova, kinta ne’e.

Enkuantu VíTIma ne’ebé kanek kmaan ho identidade sexu feto, insiál J idade tinan 3 husi Manatuto atuál kontinua hetan tratamentu iha Horex Baucau.

Kazu ne’e akontese iha oras 09:55 dadeer ne’ebé tuir rezultadu identifikasaun kauza hosi velosidade másimu ka asidente úniku iha área ponte Uailacama baliza entre postu Baucau Vila no Vemasse.

“Parte família husi EdC to’o kedas lokál akontesimentu no konfirmadu, enkuantu família husi JBG direitamente ba mortuáriu Ospitál,” Inspetór Asistente Alfredo akresenta.

Seksaun Tránzitu Baucau hetan informasaun asidente referida husi MAJ Andrew nu’udar tropa Austrálianu ne’ebé hetan vítima J iha estrada nune’e kontinua kedas kontaktu ba parte seguransa hodi halo evakuasaun.

Motorizada ho marka Honda Beat xapa-matríkula T-6323 halo viajen husi Baucau ho diresaun Manatuto atualmente parte seksaun tránzitu asegura ona iha komandu PNTL munisípiu Baucau ho kondisaun di’ak.

Notísia relevante: Asidente tráfegu iha Carabela rezulta ema na’in-rua lakon vida

Jornalista   : Natalino Belo 

Editór          : Evaristo Soares Martins 

iklan
iklan

Leave a Reply

iklan
error: Content is protected !!