iklan

EKONOMIA, HEADLINE

MCI – WIPO diskute atu estabelese Gabinete Propriedade Intelektuál iha TL

MCI – WIPO diskute atu estabelese Gabinete Propriedade Intelektuál iha TL

Ilustrasaun

DILI, 06 juñu 2024 (TATOLI)—Governu liuhusi Ministériu Komérsiu no Indústria hamutuk ho Organizasaun Mundiál Propriedade Intelektuál (WIPO) diskute ona atu estabelese Gabinete Propriedade Intelektuál modernu no viavel ba inovasaun, kreatividade no kresimentu ekonómiku entre nasaun no empreza sira iha Timor-Leste.

“Objetivu husi workshop ohin nian mak atu fahe informasaun no diskute kona-ba akordu kona-ba asuntu direitu propriedade Intelektuál no mós estabelese Gabinete Propriedade Intelektuál modernu no viavel ba inovasaun, kreatividade no kresimentu ekonómiku entre nasaun no empreza sira iha ita-nia rain,” Vise-ministru Komérsiu no Indústria, Agusto Junior Trindade, informa ba jornalista sira iha Timor Plaza, ohin.

Vise-MTCI, Agusto Junior. Imajen TATOLI/Antonio Daciparu

Vise-ministru ne’e dehan, husi Workshop ne’e importante tebes atu kuadru MCI sira tenke komprende kona-ba indústria intelektuál ne’e rasik hafoin sira bele halo sosializasaun.

“Ha’u husu ba funsionáriu tomak husi MCI atu bele komprende liután kona-ba indústria intelektuál ne’e rasik, entaun ho ida ne’e mak espesialista na’in rua husi Zenebra atu tulun ita atu hasa’e liu tan ita-nia koñesimentu, nune’e bainhira ita implementa karik la iha problema ba ida-ne’e, tanba ita mós hola parte ba adezaun OMK ne’e rasik,” nia afirma.

Governante ne’e esplika, espesialista sira ne’e mai akonpañamentu tanba sira mós iha ligasaun ba iha preparativu ba ASEAN nian.

“Espesialista sira ne’e mai akonpañamentu ita, tanba sira mós iha ligasaun uitoan ba ita-nia preparativu ba ASEAN, entaun sira mai atu apoiu ita ba ida-ne’e, maibé sira husu urjente atu estabelese Gabinete Propriedade Intelektuál modernu ida no mós ekipa ida atu bele servisu ba ida-ne’e, liu-liu ba kódigu indústria nian no mós marka ba indústria sira nian,” nia relata.

Iha fatin hanesan, Diretór jerál WIPO, Daren Tang, afirma semináriu nasionál ida-ne’e kona-ba estabelesimentu Gabinete Propriedade Intelektuál iha Timor-Leste ne’ebé organiza hamutuk husi Ministériu Komérsiu no Indústria no WIPO.

“Ha’u hakarak hato’o ami-nia agradese no apresiasaun ba Vise-ministru Komérsiu no Indústria tanba fó treinamentu ba eventu ida-ne’e ho nia prezensa ne’ebé di’ak no loke workshop ohin. Ita-boot nia kompromísiu ba dezenvolvimentu ekosistema propriedade intelektuál nasionál ida ba Timor-Leste ne’ebé di’ak tebes,” Dareng Tang agradese.

“Ita-boot nia prezensa iha ne’e haruka mensajen ida-ne’ebé forte no klaru katak Timor-Leste iha determinasaun atu dezenvolve sistema propriedade intelektuál modernu no viavel (IP) ne’ebé permite inovasaun, kreatividade no kresimentu ekonómiku entre nasaun no empreza Timor-oan sira,” ezekutivu ne’e reitera

Nia afirma, nu’udar nasaun foun ida-ne’ebé deklara independénsia iha sékulu-21 nia laran, Timor-Leste hetan ona progresu boot iha tinan rua nia laran, la’ós pelumenus iha área estabilidade polítika, kresimentu ekonómiku, edukasaun, kuidadu saúde, dezenvolvimentu infraestrutura, no seluktan.

Notísia relevante:INCT aproxima Fransa rejista ISBN asegura plajiárizmu obra akadémiku

Jornalista : Felicidade Ximenes

Editór: Rafael Ximenes de A. Belo

iklan
iklan

Leave a Reply

iklan
error: Content is protected !!