PNTL aplika TIR ba autór tuda karreta PNTL iha Baucau
BAUCAU, 06 juñu 2024 (TATOLI) – Komandu Polísia Nasionál Timor-Leste (PNTL) munisípiu Baucau aplika Termu Identidade Rezidénsia (TIR) ba autór tuda karreta seguransa iha área Uailili, postu administrativu Baucau Vila, munisípiu Baucau.
Kazu ne’ebé akontese iha oras 20:00 kalan, loron-tersa, 04 maiu, rezulta karreta patrulla husi PNTL Baucau ho marka Hilux xapa-matríkula 05-703 vidru rahun iha parte kotuk nune’e komandu identifika autór no kontinua halo investigasaun, ikus mai aplika TIR ba suspeitu na’in-rua.
“Suspeitu na’in-rua ne’e horisehik rejista ona, ita aplika TIR,” Komandante PNTL Munisípiu Baucau, Superintendente Xefe Antoninho Mauluta hateten iha Vila Nova, kinta ne’e.
Autór ba kazu referida nu’udar membru Organizasaun Arte-Marsiál (OAM), estatutu nu’udar estudante sekundária ho inisiál MTPB idade 17 no ZRF idade 20 deskonfia harahun utiliza fiska hodi harahun vidru parte kotuk tanba PNTL bandu halo komboiu bainhira akompaña transladasaun mate-isin husi Bercoli, postu Venilale ba Vila Nova, Baucau Vila.
Suspeitu na’in-rua hetan akuzasaun danu agravadu tanba liuhusi Investigasaun suspeitu sira deklara rasik aan nu’udar autór ba kazu referIda nune’e PNTL kontinua rejista iha Ministériu Públiku (MP) númeru NUC 0048 hodi hein prosesu kontinuasaun iha Tribunál Distritál Baucau.
Alende ne’e, PNTL Baucau aplika mós TIR ba autór prinsipál na’in-ida ba kazu konfrontu entre joven iha área Vila Antiga no Teulale, loron-29 maiu ne’ebé rezulta uma komunidade hamutuk 15, karreta no motorizada ida inklui vítima na’in-rua kanek.
Suspeitu ba kazu referida ho inisiál F, idade 30 ne’ebé deskonfia sai autór prinsipál tanba tenta organiza masa hodi hamosu konfrontu bainhira akompaña transladasaun mate-isin husi Dili ba Diwake.
“Nia (suspeitu) mak organiza, nia rasik mak prontu responsabilidade,” Superintendente Xefe Antoninho Mauluta akresenta.
Kazu konfrontu referida rejista ona iha MP no hein prosesu kontinuasaun iha Tribunál Distritál Baucau.
Notisia relevante: Ema deskoñesidu tuda rahun karreta PNTL Baucau
Jornalista : Natalino Belo
Editór : Evaristo Soares Martins
