Ministériu Interiór sei rezolve reforma institusionál hafoin rektruta membru PNTL foun

DILI, 08 juñu 2024 (TATOLI) – Ministru Interiór Francisco Guterres, dehan estatutu pesoál Polísia Nasionál Timor-Leste (PNTL) no diploma ba proposta rekrutamentu aprovadu ona maibé sei rezolve uluk kestaun reforma institusionál molok rekruta membru foun.
“Proposta rua ne’ebé aprova iha Konsellu Ministru foin daudaun ne’e seidauk promulgadu, kuandu promulgadu ami sei halo faze ba faze. Faze primeiru ami tenke rezolve tiha kondisaun, faze segundu ami tenke rezolve problema orientasaun sira kona-ba reforma nian, faze terseiru mak rekrutamentu, faze kuatru restruturasaun, fase dahaat ne’e pelumenus fulan-neen mak atu rezolve, kuandu proposta ne’e promulgadu iha fulan ida-ne’e”, Francisco Guterres hateten ba jornalista sira hafoin partisipa serimónia pose ba kargu xefia hosi Ministériu Interiór hamutuk 95 ne’ebé halo iha Delta Nova, sábadu ne’e.
Nia esplika, Governu sei halo uluk reforma ba membru PNTL sira, tanba atu haree númeru hira mak afeta ba rekrutamentu hafoin Govenu hatene membru PNTL hira mak atu rekruta no membru sira ne’e mai atu koloka iha ne’ebé.
“Kuandu proposta ne’e promulgadu ona, ita sei tama uluk prosesu promosaun no depois ida-ne’e ita sei halo uluk faze reforma, kuandu ida-ne’e hotu automatikamente ita sei tama ba prosesu rekrutamentu no rekrutamentu ne’e posivél bele akontese iha fulan-Setembru. Prosesu ida-ne’e naruk, tanba tenke tuir faze”, nia adianta.
Governu planeia atu rekruta membru PNTL hamutuk 300.
“Maibé ami sei haree, sé reforma ne’e mak afeta barak liuba númeru operasionál, entaun rekrutamentu ne’e ita halo fase por fase, ida ita halo tinan ne’e no ita kontinua tinan oin”, nia afirma.
Ministru fundamenta katak kuandu proposta mak promulgadu hosi Prezidente Repúblika, José Ramos Horta, mak foin halo re-estruturasaun ba PNTL, tuir estatutu pesoál profisionál PNTL foun haruka.
“Ita sei muda hotu naran sira iha diresaun PNTL, ita mós hamosu departamentu balun tan tuir estatatu ne’e haruka”, nia adianta.
Posibilidade estututu pesoál profisionál PNTL foun afeta ba kargu Komisáriu Jerál PNTL
Iha biban ne’e, Ministru Francisco realsa katak estututu pesoál profisionál PNTL foun bele afeta ba kargu Komandante Jerál PNTL, Komisáriu Jerál Polísia Henrique da Costa no kargu Komandante Jerál, Komisáriu Polísia Pedro Belo kuandu estututu pesoál profisionál PNTL foun implementa ona.
Nia dehan, kuandu estatutu pesoál profisionál PNTL iha nia implementasaun, MI sei halo hato’o tán proposta ida hodi diskute iha Konsellu Ministru kona-ba servisu Komandante Jerál no Segundu Komandante Jerál atu kontinua ka lae.
“Rezolusaun ne’e Konsellu Ministru mak sei deside ida-ne’e, signifika Komisáriu na’in-rua sei kontinua sira-nia mandatu ne’e depende ba Konsellu Ministru atu halo diskusaun iha ne’ebá. Ha’u seidauk bele fó hateten buat ida. Mas kuandu estatutu hahú ona, ami hahú ona prosesu promosaun, prosesu reforma no oinsá atu halo re-estruturasaun”, ministru afirma.
Jornalista: Natalino Costa
Editór : Zezito Silva

