iklan

HEADLINE, MUNISÍPIU, OÉ-CUSSE (RAEOA), SEGURANSA

MI hapara projetu Postu UPF tolu iha Oé-Cusse

MI hapara projetu Postu UPF tolu iha Oé-Cusse

Ministru Interiór, Francisco da Costa Guterres. Imajen Tatoli/Francisco Sony

OÉ-CUSSE, 10 juñu 2024 (TATOLI) – Ministériu Interiór (MI), Francisco da Costa Guterres, hapara projetu konstrusaun postu Unidade Patrullamentu Fronteira (UPF) tolu iha Rejiaun Administrativa Espesiál Oé-Cusse Ambeno (RAEOA) tanba konsidera laiha kualidade no presiza muda dezeñu.

Notísia relevante: Komunidade Bene-Ufe husu hapara konstrusaun UPF Citrana

Governante ne’e, informa, postu integradu UPF tolu ne’e, lokaliza iha fronteira Sakato, sub-rejiaun Pante Makasar, postu UPF fronteira iha sub-rejiaun Oésilo.

Nune’e mós postu UPF iha suku Bene-Ufe, Citrana, sub-rejiaun Nítibe, no prosesu tomak submete ona iha Konsellu Administrasaun Fundu Infraestrutura (CAFI, sigla portugés).

“Postu tolu ne’e ami re-dezeñu fali,  nia prosesu agora iha ona CAFI, foin lalais ami deskuti ona, depois sei re-dezeñu fila-fali, tanba iha buat balu presiza hadi’a tán fali, tanba ami labele husik polísia sira ba hela fali iha uma ne’ebé halo ho besi de’it, ne’e perigozu intermu seguransa aat tebes, maibé sira mós seguránsa ba sira-nia aan kuandu bainhira mosu sirkuitu ruma afeta ba sira-nia nia vida,” Francisco da Costa Guteres, iha Oé-Cusse, sesta ne’e.

Governante ne’e, dehan, daudaun ne’e husi CAFI konkorda ona maibé presiza hadi’a tán de’it, ninia prosesu ne’e  no sei identifika tán kompañia sira nune’e bele hahú fali prosesu ne’e.

“Ita hein katak iha fulan rua nia laran iha ona rezultadu, bele liuhusi konkursu fali maibé ne’e depende fali ba CAFI, sei deside katak atu loke konkursu públiku ruma ou fó fali ba kompañia atu kontinua de’it, maibé ami-nia proposta subemete iha CAFI, katak sei bele la’o ho modelu ida-ne’ebé kontinua nian, maibé agora depende desizaun CAFI ninian, sira haree tanba sira mós tetu hotu ida-ne’ebé di’akliu no serbisu lais no kualidade,” nia afirma.

Notísia relevante:Autoridade Nitibe husu Guvernu konstrui postu UPF iha Fatusobe

Entretantu, konstrusaun projetu postu UPF tolu ne’e mak hanesan postu UPF Sakato, konstrui husi kompañia Matlalan Unipesoál Lda, ho valór kontratu $320,046.42, projetu ne’e hahú  ezekuta iha loron 15 dezembru 2021 tenki termina iha loron 15 agostu 2022

Projetu postu integradu UPF Citrana konstrui husi kompañia Aprília Unipesoál Lda, ho valór kontratu $340,903,02, projetu ne’e hahú ezekuta iha loron 15 dezembru 2021 tuir kontratu tenke termina iha loron 15 agostu 2022.

Nune’e mós iha postu UPF Oésilo konstrui husi kompañia Lifau Indah Unipesoál Lda, konstrui husi kompañia Lifau Indah Unispesoál Lda, ho valór kontratu $343,223.00.

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!