DILI, 11 juñu 2024 (TATOLI)—Inspetór Jerál Autoridade Inspesaun no Fiskalizasaun Atividade Ekonómika, Sanitaria no Alimentar, Instituto Públiku (AIFAESA, I.P), Ernesto Monteiro, husu ba públiku hato’o keixa ba AIFAESA bainhira hetan produtu sira ne’ebé liu ona prazu iha loja ka merkadu sira.
“Karik maluk sira ne’ebé hetan produtu balun expire bele hato’o keixa direita mai AIFAESA nune’e ekipa sira tuun halo inspesaun no halo investigasaun,” Inspetór Ernesto Monteiro, hateten, liuhusi entrevista ho Agência TATOLI, iha nia knaar fatin, Matadouro, ohin.
Nia hateten, hahú husi janeiru mai to’o iha maiu, AIFAESA limitadu ho funsionariu sira, tanba funsionáriu sira-nia kontratu remta iha 31 dezembru, maibé hetan despaxu husi Ministériu Koordenadór Asuntu Ekonómiku, kona-ba fó kompetensia ba Inspetór Jerál atu fó kontratu ba iha traballadór sira no mós hetan apoiu hosi MKAE ba funsionamentu AIFAESA nian, entaun agora daudaun funsionáriu sira iha ne’e hamutuk 90-resin.
“Antes ne’e, ita-nia tékniku sira hamutuk 123 kompostu husi funsionáriu permanente, destakadu no mós funsionariu kontratu. Agora ita iha ona funsionáriu 90%, nune’e ba ha’u katak ida-ne’e natoon ona atu halo atividade inspesaun iha terrenu,” nia relata.
Inspetór Jerál AIFAESA, Ernesto Monteiro afirma, funsionáriu sira tenke hatene atividade inspesaun nune’e ba terrenu karik bele hatene atividade inspesaun iha ne’ebá.
“Ha’u iha obrigasaun atu fó hatene tékniku sira atu hala’o servisu iha terrenu la’o ho di’ak, tanba ne’e ha’u garante númeru funsionáriu ne’e bele halo inspesaun iha terrenu, tanba ita haree produtu balun expire ona iha merkadu sira, entaun ida-ne’e mak ita-nia tékniku sira tau haree ba ida-nee,” nia esplika.
Entre janeiru no maiu, atividade AIFAESA la la’o normál kompara agora. “Ami-nia funsioamentu la’o normál hahú iha horseik hodi hatan ba preokupasaun komunidade nian iha terrenu,” nia konklui.
Notísia relavente:Reprezentante povu kontinua husu AIFAESA. IP kontrola sasán liu prazu
Jornalista : Felicidade Ximenes
Editór: Rafael Ximenes de A. Belo
