iklan

NASIONÁL, DESPORTU, DILI, HEADLINE

Manán 5-0, Coach Eleven FC ultrapasa ba oitavu finál

Manán 5-0, Coach Eleven FC ultrapasa ba oitavu finál

Jogu Futebol Kopa Maun Boot Kayrala Xanana Gusmão 2024, Coach Eleven kontro AS Kantada, iha estadiun Munisípal Dili, kinta (13/06). Imajen Tatoli/Francisco Sony

DILI, 13 juñu 2024 (TATOLI) – Ekipa Coach Eleven susesu iha nia jornada 16 finál hodi ultrapasa ona ba oitavu finál kopa Maun Boot Kay Rala Xanana Gusmão bainhira festa golu ba adversáriu AS Kantada ho rezultadu 5-0.

Jogu ba ekipa rua lidera husi árbitru prinsipál Eufrasio Vieira, juiz liña Filomeno da Silva, Donatos Portela no árbitru rezerva Bernardinho Mascarinhas no jogu realiza iha Estádiu Munisipál Dili, kinta loraik ne’e.

Bainhira jogu hahú ekipa rua lansa kedan kontra no atake ba malu tuir tékniku no abilidade ekipa idaidak nian oinsa mak hatama golu.

Eleven utiliza nia forsa hotu ho másimu, oinsa atu prodús golu ne’ebé lais, Kantada mós lansa atake maibé Eleven tenta hamate tutuir jogu ne’ebé Kantada halo.

Ho atake ne’ebé maka’as iha minutu 9 jogadór Eleven Expedito Conseição (10) lansa ona golu primeiru hodi muda rezultadu ba 1-0. Golu ne’e halo Eleven forsa liutan iha nia jornada, jogadór sira hala’o servisu ho másimu, fiar malu iha kampo laran.

Kantada nafatin hatudu jogu maibé falla iha lina klaran no defeza ikus falla atu prodús golu. Ho fallansu ne’ebé Kantada halo iha lina defeza jogadór Eleven utiliza kedan oportunidade hodi lansa atake ne’ebé adekuadu oinsa mak aumenta golu.

Ikus mai iha minutu 13 jogadór Expedito prodús tan golu segundu muda rezultadu ba 2-0, golu ne’e halo Kantada dada iis aruk iha kampo laran. Kantada tenke servisu maka’as oinsa hamate Eleven nia jogu, maibé la konsege tanba jogadór sira nia kbi’it la sufisiente.

Jogu la’o manas liutan, Kantada buka meiu hotu atu prodús golu maibé Eleven la fó fatin, ikus esforsu hotu ne’ebé Kantada halo hela de’it hanesan esforsu ba sira nia ekipa istimadu.

Nune’e jogu la’o to’o minutu 32 jogadór João Pedro (22) lansa tan golu ida lori kedan Eleven ba lidera jogu ho eskore 3-0, golu ne’e halo Kantada triste liutan iha kampo laran ranba minutu jogu sei tomak maibé Eleven prodús ona golu tuir sira nia halarak.

Eleven forsa tebes iha nia jornada, halo Kantada book-aan la di’ak, nune’e iha minutu 37 jogadór Expedito aumenta tan golu ida muda rezultadu ba 4-0 hodi hatudu ba Kantada katak Eleven la’os ekipa fraku.

Ho golu ne’ebé Expedito halo laiha tan golu ruma mak akontese to’o minutu primeira parte termina laiha tan golu ruma akontese nune’e jogadór sira tenke deskansa tia minutu balu hodi kontinua fali ba segunda parte.

Haka’at ba segunda parte ekipa rua kontinua lansa kontra no atake ba malu, maibé Eleven nafatin hatudu liu nia forsa, nune’e Kantada tenke joga ho kalma ho defensivu oinsa Eleven labele aumenta tan golu. Nune’e Kantada mós esforsu atu prodús golu maibé la konsege tanba defeza Elevan la fó fatin.

Ho forsa ne’ebé maka’as iha minutu 56 jogadór João Pedro lansa tan golu ida hodi lori Eleven nia rezultadu ba tur metin iha 5-0. Kantada tenke simu realidade, maske esforsu maibé nunka halo golu, ikus tenke hela ho derrota.

Husi rezultadu ne’ebé Eleven hetan tebe sai ona Kantada husi kopa Xanana, nune’e Eleven kontinua kedan ba oitavu finál ne’ebé sei hala’o semana oin mai.

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!