iklan

NASIONÁL, DESPORTU, DILI, HEADLINE

Kopa FFTL: São José FC manán  FC Ostico ho eskore 2-0

Kopa FFTL: São José FC manán  FC Ostico ho eskore 2-0

Jogu Futebol Kopa Maun Boot Kayrala Xanana Gusmão 2024, Ostico FC kontra São Josse, iha estadiun Munisípal Dili, sesta (14/06). Imajen Tatoli/Francisco Sony

DILI, 14 juñu 2024 (TATOLI) – Ekipa São José FC susesu iha nia jornada faze grupu hodi manán adversáriu FC Ostico ho rezultadu 2-0, iha jogu Kopa Federasaun Futeból Timor-Leste (FFTL) ne’ebé realiza iha Estádiu Munisipál Dili, sesta loraik ne’e.

Bainhira jogu la’o ekipa rua lansa kedan kontra no atake ba malu ho ambisaun ne’ebé maka’as oinsa bele hatama golu.

Jogadór hotu iha kampo laran hatudu tékniku no abilidade ne’ebé másimu, São José halo presaun ne’ebé adekuadu oinsa hatama golu lais. Maibé la konsege tanba jogadór Ostico mós la fó fatin.

Jogu Futebol Kopa Maun Boot Kayrala Xanana Gusmão 2024, Ostico FC kontra São Josse, iha estadiun Munisípal Dili, sesta (14/06). Imajen Tatoli/Francisco Sony

Ostico mós halo atake ne’ebé brillante maibé sempre hamate tutuir husi jogadór São José nian. Adeptus sira nakonu iha tribun leten, hakilar ho lian oioin, fó suporta ba sira nia ekipa favoritu oinsa bele hatama golu lais.

Avansadu São José hetan oportuniade barak maibé sempre falla iha finalidade nune’e seiauk bele prodús golu, treinadór ekipa rua la tur nonok hamrik iha kampo ninin orienta jogadór sira oinsa bele halo jogu ne’ebé ho di’ak tuir orientasaun ne’ebé haraik ona iha treinamentu.

São José nunka lakon esperansa, kontinua lansa atake, ikus servisu hotu ne’ebé São José halo la hela de’it hanesan servisu tanba iha minutu 44 jogadór Miguel Barbosa (19) lansa ona golu primeiru hodi hatur rezultadu ba 1-0. Golu ne’ebé São José halo hanesan golu ikus ba ekipa rua iha minutu primeira parte.

Hakur ba segunda parte ekipa rua nafatin lansa kontra no atake ba malu. Ostico esforsu oinsa halo empata jogu ne’e maibé la konsege tanba defeza São José la fó fatin.

Nune’e esforsu ne’ebé Ostico halo hela de’it hanesan esforsu tanba la prodús golu hodi fó nafatin oportunidade ba São José hodi lidera jogu.

São José nafatin halo atake ne’ebé maka’as ho jogu ne’ebé bonitu ikus iha minutu 73 jogadór Miguel kompleta tan golu ida lori rezultadu  ba 2-0.

Golu ne’e halo Ostico tenke servisu maka’as liu tan, maibé ikus falla nafatin nune’e to’o minutu normál jogu nian termina vitoria hela ba São José hodi rekolla pontu tolu no Ostico hela ho derrota. 

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!