iklan

NASIONÁL, JUSTISA, HEADLINE

KM aprova rejime foun ba atividade Sentru Formasaun Jurídika no Judisiária

KM aprova rejime foun ba atividade Sentru Formasaun Jurídika no Judisiária

Vise-Primeiru-Ministru no Ministru Koordenadór Asuntu Ekonómiku, Francisco Kalbuadi Lay, prezide reuniaun Konsellu Ministru, iha Palásiu Governu, kuarta (29/05/2024). Imajen Tatoli/Francisco Sony

DILI, 19 juñu 2024 (TATOLI) – Reuniaun Konsellu Ministru (KM) iha Palásiu Governu Dili kuarta ne’e, aprova Projetu dekretu-lei kona-ba alterasaun dahuluk ba Dekretu-Lei No. 10/2020, loron 25 fulan-marsu, rejime foun kona-ba atividade formasaun Sentru Formasaun Jurídika no Judisiária (CFJJ-sigla portugés), ne’ebé aprezenta husi Koordenadora Grupu Traballu ba Reforma Setór Justisa, Lúcia Lobato.

“Objetivu Governu IX Konstitusionál no rekomendasaun husi relatóriu “Ba justisa ida ne’ebé di’ak-liu”, ne’ebé aprezenta ba Governu husi Grupu Traballu ida ne’e, reforma ida-ne’e ho objetivu atu transforma CFJJ sai sentru exelénsia ida ba profisionál sira setór judisiál nian,” tenik iha nota ne’ebé Agência TATOLI asesu husi media Gabinete Primeiru-Ministru.

Alterasaun prinsipál sira ne’ebé mai ho diploma ida-ne’e inklui alterasaun ba kompozisaun juri konkursu ingresu nian, ne’ebé daudaun ne’e sei iha membru lima, inklui formadór husi CFJJ.

Medida ida-ne’e permite atu liberta liután majistradu no defensór públiku sira husi tarefa rekrutamentu, atu sira konsentra uainhira hala’o sira-nia funsaun.

Objetivu ba alterasaun ne’ebé propoin mak atu promove kapasitasaun profisionál no domíniu ba lian portugés, ho faze formasaun eskolár no prátika ne’ebé sei hala’o iha país sira ne’ebé ko’alia portugés, liuhusi kooperasaun ho entidade estranjeira sira.

Faze eskolár ne’e reorganiza hodi foka-liu ba matéria jurídika sira ne’ebé esensiál, inklui avaliasaun interkalár eliminatória ida hafoin fulan sanulu-resin-rua.

Klasifikasaun finál ba faze formasaun ne’e define fila-fali, hodi atribui 60% ba faze eskolár no 40% ba prátika. Aleinde ne’e, prevee posibilidade abertura ba konkursu estraordináriu durante kursu ingresu, hodi prienxe nesesidade rekursus umanus iha karreira majistratura no defensória públika nian.

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!