iklan

HEADLINE, SEGURANSA

Komandu PNTL alerta mantein komunikasaun ho TNI asegura fronteira iha ámbitu vizita Amu Papa

DILI, 20 juñu 2024 (TATOLI) – Komandante Jerál Polísia Nasionál Timor-Leste (PNTL), Komisáriu Jerál Polísia Henrique da Costa, orienta Komandante Munisípiu no Unidade Patrollamentu Fronteira (UPF) atu mantein komunikasaun di’ak ho Tentara Nasionál Indonézia (TNI) atu asegura liña fronteira ho di’ak iha ámbitu vizita Papa.

“Ita husu sira atu mantein komunikasaun di’ak ho sira TNI no POLRI tanba sira hanesan parseiru ne’ebé di’ak iha fronteira ita kontinua mantein komunikasaun ho sira para ita kria ekipa konjunta ne’ebé mak bele apoia seguransa husi nasaun viziñu hodi bele asegura seguransa iha área fronteira ninia iha ámbitu vizita Sua Santidade Papa nian mai ita-nia rai”, Komisáriu Jerál Polísia Henrique da Costa hateten ba jornalista sira hafoin enkontru ho Ofisiál Polísia Suku sira iha salaun CNE, kinta ne’e.

Nia dehan, iha liña fronteira presiza reforsa seguransa tanba hanesan pontu entrada nasaun nian.

“Ita hatene iha liña fronteira ita koloka ita-nia polísia Unidade Patrollamentu Fronteira no mós Komandu Munisípiu sira ne’ebé mak iha liña fronteira ne’ebé diretamente ho nasaun viziñu  hanesan Indonézia, ita orienta sira atu hamutuk hodi reforsa seguransa”, nia adianta.

Henrique fó orientasaun ba Ofisiál Polísia Suku (OPS) atu fó seguransa iha idak idak nia suku ho másimu iha ámbitu vizita Sua Santidade Papa.

“Komandu PNTL fó orientasaun ba sira atu nun’ee sira bele servisu hamutuk ho Xefe do Suco sira ho katekista sira hodi alista sarani sira kada iha sira nia suku, Postu Adminiatrativu, hosi Parokia atu mai partisipa iha missa iha tempu  Sua Santidade nia vizita ne’e ,” nia afirma.

Komandante husu ba komunidade sira atu servisu hamutuk ho autoridade sira katak bainhira mosu buat ruma karik informa diretamente mai komandu.

“Kuandu sira hetan informasaun ruma ka sira identifika buat ruma, sira bele pasa kedan ba ita nian komandu atu bele elabora nian planu operasaun ida ke di’ak, justu hodi bele asegura seguransa iha vizita Sua Santidade”, nia dehan.

Nia husu ba OPS atu mantein komunikasaun ho lider komunitáriu, juventude, igreja, veteran no NGO sira iha suku, atu mantein situasaun ne’ebé seguru.

“Sira tenke kria komunikasaun ne’ebe di’ak atu iha buat ruma, komunidade sira bele pasa ba ita nia polísia tanba sira tenke hatene katak sira mak liman ain diretamente komandu nian iha suku sira. Sira tenke mantein servisu ho profisionál atu nafatin kuidadu imajen di’ak Polísia Nasionál Timor-Leste nian tanba sira-nia prezensa iha suku sira ne’e atu servi ba ita-nian komunidade sira, laos ita ba iha ne’ebá kria fali grupu ka kria distánsia polísia ho ita-nia komunidade sira”, nia fó-hanoin.

Komisáriu dehan, Komandu PNTL nota OPS enfrenta difikuldade ba transporte no rádiu  komunikasaun maibé sei fó solusaun.

“Buat sira ne’e laos sai obstakulu ba polísia atu halo servisu, biar nun’e ita-nia OPS tenke kontinua halo servisu no ita husu para buat ne’ebé sira iha ne’e, sira uza nafatin halo servisu ba  maibé komandu buka meiu oinsá para bele apoiu sira iha sira-nian servisu”, nia konklui.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!