iklan

JUSTISA, HEADLINE

Membru PNTL na’in-tolu sai arguidu ba kazu pekulatu

Membru PNTL na’in-tolu sai arguidu ba kazu pekulatu

TDD. Imajen Tatoli /Dok

DILI, 20 juñu 2024 (TATOLI) – Tribunál Judisiál Primeira Instánsia Dili (TJPID) iha kinta (20/6) ohin, halo julgamentu dahuluk ba membru Polísia Nasionál Timor-Leste (PNTL) na’in-tolu ho inisiál DM, LL no BDS tanba sai arguidu ba kazu pekulatu ne’ebé previstu iha artigu 295 hosi Kódigu Penál Timor-Leste.

Arguidu ho inisiál DM no L nu’udar membru PNTL baibain enkuantu arguidu BDS nu’udar Diretór Lojístika Komandu Jerál PNTL iha 2014.

Tuir faktu ne’ebé arrolla hosi Ministériu Públiku katak kazu ne’e akontese iha outubru 2014, bainhira arguidu BDS nu’udar Diretór Lojístika Komandu Jerál PNTL nian hodi jere ba kupon mina atu ense ba karreta PNTL hodi ba halo servisu.

Maibé iha momentu ne’e, arguidu BDS foti mina kupon ho ulun hitu hodi orienta nia membru na’in-rua hodi ba faan fali kupon mina ne’e ba ema, nune’e arguidu na’in-tolu fahe malu.

Arguidu sira hatene katak atus ne’ebé sira halo ne’e krime no fó prejuizu ba Estadu, maibé sira kontinua halo atus ne’e. Nune’e haree ba arguidu sira-nia hahalok ne’e, Ministériu Públiku konstitui sira ba arguidu krime pekulatu, tanba uza sasan Estadu hodi benefisia fali ba sira-nia aan.

Hatan ba akuzasaun Ministériu Públiku nian, arguidu DM hateten ba Tribunál katak iha momentu outubru 2014,  arguidu BDS mak bolu sira-nain rua, arguidu LL tama ba arguidu BDS nia fatin.

“Arguidu dehan ba ami rua katak ha’u iha kupon mina ulun hitu iha ne’e no kada kupon ne’e ulun ida ho osan totál $1000. Señor arguidu dehan ba ami rua, ha’u presiza osan, ha’u osan laiha imi rua halo nusa para ha’u hetan osan para ha’u atu ba haree ha’u nia oan iha Surabaya. Nune’e momentu ne’ebá kedan ha’u ho kolega, ami ba faan tiha kedan kupon mina ulun hitu ne’e ba ema”, arguidu DM haktuir ba Tribunál iha sala julgamentu kinta, ohin.

Arguidu deklara tán katak hafoin faan hotu tiha kupon mina ne’e ba ema arguidu sira entrega kedan osan ne’e ba arguidu BDS hodi fahe osan $1.000 hodi arguidu na’in-rua bele fahe malu.

“Hafoin ami faan hotu tiha kupon mina ne’e ami ba entrega ba arguidu BDS no arguidu fó osan ba ami rua kada ema ida ho montante $500, maibé osan $6.000 arguidu mak foti no uza”, nia konklui.

Audiénsia julgamentu ne’e prezide hosi Juiz koletivu Juiza Ercilia de Jesus, Ana Paula Fonseca, José Maria de Araujo,  Ministériu Públiku reprezenta hosi Prokuradora Lidia Soares, Arguidu BDS hetan asistensia legál husi advogadu privadu Arlindo Sanches no Arguidu DM hetan asisténsia legál husi Defensora Públika Joana Cristina Pinto.

Tribunál seidauk foti konkluzaun ba prosesu julamentu ida-ne’e tanba sei rona tan arguidu ida ba kazu ne’e no Tribunál sei marka fila fali iha 17 jullu, oras 16:00

Jornalista: Natalino Costa

Editór : Zezito Silva

 

 

iklan
iklan

Leave a Reply

iklan
error: Content is protected !!