iklan

JUSTISA, HEADLINE

MP husu Tribunál haruka espesialista PCIC teste ba arma item 24

MP husu Tribunál haruka espesialista PCIC teste ba arma item 24

Longuinhos Monteiro

DILI, 20 juñu 2024 (TATOLI) – Ministériu Públiku (MP) husu Tribunál atu haruka espesialista Polísia Sientífika Investiasaun Kriminál (PCIC, sila portugés) hodi teste arma ho item 24 ne’ebé arguido Longuinhos Monteiro rai iha nia rezidénsia.

Liuhosi julgamentu kontinuasaun kinta (20/6) ohin, ba kazu arma proivida ne’ebé envolve hosi arguidu Longuinhos Monteiro, Ministeriu Públiku liuhosi Prokuradór Domingos Goveia Leite, rekere ba Tribunál atu autoriza espesialista Polísia Sientifika Investigasaun Kriminál (PCIC, sigla portugés) atu halo teste ba arma sira ho item 24 ne’ebé arguidu LonguinhosMonteiro rai iha nia rezidensia.

Prokuradór Domingos Goveia iha julgamentu kontinu, hateten MP husu Tribunál atu haruka espesialista PCIC halo teste ba arma sira ne’e, tanba MP atu hatene de’it katak arma sira ne’ebé mak arguidu rai iha nia rezidénsia ne’e, nudar arma de fogo ga laos.

”Husu ba Tribunál koletivu ida-ne’e, atu autoriza espesialista Polísia Sientífika Investigasaun Kriminál hodi halo ezaminasaun ba arma hamutuk item 24 ne’ebé Ministériu Públiku hakerek iha akuzasaun atu konfirma katak arma sira ne’ebé mak hakerek iha akuzasaun laran ne’e los duni nudar arma de fogo ga laos arma de fogo. Ida-ne’e mak Ministériu Públiku nia hakarak”, Prokuradór Domingos hateten iha sala Julgamentu Tribunál Judisiál Primeira Instánsia Dili, kinta ne’e.

Maibé arguidu Longuinhos Monteiro, lakonkorda pedidu hosi Ministériu Públiku ho razaun fundamentu katak arguidu mós iha koñesimentu di’ak liu kona-ba tipu arma sira, tanba ne’e mak la presiza espesialista PCIC atu halo fali teste ba arma sira ne’ebé mak hakarek iha akuzasaun MP nian.

“Ha’u lakonkorda ho rekerimentu Ministériu Públiku nian ne’e. Tanba ha’u mós iha koñesimentu di’ak liu kona-ba arma sira ne’e”, nia afirma.

Hatan ba pedidu hosi MP nian, Tribunál liuhosi Juiz Titulár ba prosesu ne’e, Juiza Maria Solana hateten, aseita pedidu MP nian no sei halo despaisu ida ba Polísia Sientífika Investigasaun Kriminál hodi autoriza nia espesialista PCIC atu halo teste ba arma ho item 24 ne’ebé  hakerek iha akuzasaun MP nian.

Nia dehan, pedidu ida-ne’e importante tanba iha julgamentu tuir mai, espesialista PCIC ne’e bele deklara ba MP no ba Tribunál kona-ba tipo de arma sira ne’e.

Hafoin Tribunál rona tiha parte hotu, Tribunál deside julgamentu ne’e kontinia fali ba loron 17 jullu tuku 16:00 loraik.

Audiénsia julgamentu ne’e prezide hosi Juiz koletivu Juiza Maria Solana, Albertina Neves no Afonso Carmona, Ministeriu Públiku reprezenta hosi Prokuradór Domingos Gooveia Leite no arguidu hetan asisténsia legál hosi Advogadu nain rua.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!