DILI, 20 juñu 2024 (TATOLI)—Sekretaria Estadu Igualdade (SEI) hamutuk ho Ministériu Administrasaun Estatál (MAE), kinta ne’e, fó formasaun hakbiit líder feto hamutuk 54 husi suku ne’ebé foin lalais eleita sai xefe suku no xefe aldeia, kona-ba promosaun igualdade jéneru no lideransa transformativu.
Sekretária Estadu Igualdade, Elvina Sousa Carvalho, hateten, formasaun ne’e importante tebes ba sira atubele reforsa kapasidade durante mandatu.
“Formasaun ne’e ko’alia kona-ba SEI halo formasaun public speaking, jestaun lideransa, no halo oinsá sira iha esperénsia sai líder ne’ebé inkluzivu no promove igualdade jéneru iha sira-nia lideransa no promove dezenvolvimentu inkluzivu iha suku-laran,” Sekretáriu Estadu relata iha salaun Tower, Fatuhada, kinta ne’e.
Notísia relevante : MAE fahe informasaun kona-ba devér no direitu ba funsionáriu iha Baucau
Durante formasaun, líder lokál sira la’ós simu de’it formasaun husi formadór sira maibé entre sira ne’e balun hetan ona mandatu dala-rua ka tolu, ne’ebé sei fahe nia esperiénsia ba líder lokál sira ne’ebé foin eleitu dala-ida hodi sira bele apreende ba malu.
Iha fatin hanesan, Diretór Nasionál Governu Lokál, Elvino Bonaparte do Rego, hateten, formasaun ne’e importante tebes ba líder komunitária sira tanba sira mak Governu nia liman ain ne’ebé besik liu ba povu.
“Ha’u husu ba líder komunitáriu sira, nu’udar feto dahuluk suku nian, tenke sai hanesan inan ida ba suku ne’ebé imi ukun, nune’e aproveita didi’ak formasaun ne’e hodi dezenvolve imi-nia suku, tanba iha formasaun ne’e ita mós sei fó matéria kona-ba papél líder komunitária tuir lei suku númeru 9/2016,” nia dehan.
Iha fatin hanesan, Xefe suku Bairru-Pité, Joaninha Alves, agradese no kontente tebes tuir formasaun ne’e tanba bele ajuda serbisu durante mandatu.
“Ha’u nia espetativa ba formasaun ne’e oinsá bele iha koñesimentu no abilidade liuhusi formasaun ne’e atu ajuda ami hodi ami bele dezenvolve no halo jestaun di’ak ba ami-nia suku,” nia akresenta.
Jornalista : Arminda Fonseca
Editora : Julia Chatarina
