MAPPF kolleta hare husi Brunei tonelada 7,8 iha Baucau
DILI, 21 Juñu 2024 (TATOLI) – Projetu pilotu ba kuda fini hare husi Brunei ne’ebé implementa iha Vemasse-Baucau hatudu ona nia rezultadu, tanba Ministériu Agrikultura, Pekuária, Peska no Floresta (MAPPF) kolleta ona tonelada 7,8.
Diretór-Jerál Agrikultura, Kafé no Planta Industriál, Martinho Laurentino Soares, informa katak fini hare husi Brunei ne’e Ministériu Agrikultura kuda hanesan pilotu ida iha Baucau no Maliana iha rai ektare 40, no Baukau mak kolleta uluk ona, enkuantu Maliana sei hein tan semana rua atu kolleta.
“Fini hare Brunei ne’ebé ita kuda iha Baucau no Bobonaro-Maliana ne’e iha tipu rua. Husi tipu rua ne’e ita konsege koleta uluk ona iha Baucau hamutuk hare tonelada 7,8, husi hare tipu BPH-188 ho tonelada tolu no tipu BRD-5 tonelada 4,8”, Martinho Soares dehan ba Tatoli iha Comoro, ohin.
Hare husi Brunei ne’ebé sira kolleta ona iha Baucau ne’e agora asegura ona iha fatin ne’ebé ne’ebé maran atu udan been labele kona no hoban hodi hein prosesu levantamentu dadus ne’ebé ekipa téknika sira sei halo hamutuk ho hare sira seluk ne’ebé kuda iha territóriu.
“Hare Brunei ne’ebé kuda iha Bobonaro-Maliana mós hatudu ona ninia progres tanba isin ona, maibé tuir tékniku sira katak bele hein tan semana rua maka bele koleta, tanba sira kuda ikus”, nia reitera.
Tuir diretór ne’e, fini hare husi Brunei ne’ebé ministériu kuda iha munisípiu rua ne’e ho objetivu atu responde ba promesa nasaun Brunei nian ne’ebé hakarak atu mai investe iha área agrikultura hodi ajuda hasa’e produsaun iha Timor-Leste, nune’e bele hamenus importasaun foos.
Kompromisu ne’ebé Brunei iha katak bainhira fini hare ne’e hetan ona progresu di’ak, sira hakarak garante investimentu iha futuru.
“Sira sei mai fali atu diskute asuntu ne’e ho Ministru Agrikultura, tanba prosesu atu kuda hare Brunei sei presiza natar ektare 100. Bainhira haree sira ne’e kontinua fó benefísiu ba povu no komunidade agrikultór iha Timor-Leste maka sira sei husu atu aumenta tan volume natar”, adianta.
Notísia relevante: Ministériu Agrikultura implementa projetu pilotu kuda fini hare husi Brunei
Jornalista: Tomé Amado
Editora: Maria Auxiliadora
