iklan

NASIONÁL, JUSTISA, DILI, HEADLINE, SEGURANSA

MJ-MI no SNI aprezenta relatóriu serbisu ba Xefe Governu

MJ-MI no SNI aprezenta relatóriu serbisu ba Xefe Governu

Ministru Justisa, Sergio Hornai.Foto Tatoli/Francisco Sony

DILI, 21 juñu 2024 (TATOLI) – Ministru Justisa (MJ) Sergio Hornai, hamutuk ho Ministru Interiór (MI) Francisco Guterres no Diretór Servisu Nasionál Intelijensia (SNI), Longuinhos Monteiro, sesta ne’e, hasoru malu ho Primeiru-Ministru, Kay Xanana Gusmão, hodi aprezenta relatóriu servisu durante ne’e.

“Ha’u hamutuk ho Ministru Interiór ho Diretór SNI aprezenta relatóriu serbisu durante ne’e ami halo ona ba Primeiru-Ministru kona-ba situasaun jerál hanesan justisa, seguransa no intelijensia nian,” MJ Sergio hatete ba jornalista sira hafoin remata enkontru ho PM Xanana.

Iha hasoru malu ne’e,  Primeiru-Ministru mós konfirma kona-ba serbisu saida de’it mak parte tolu ne’e halo ona hodi kontribui ba pás iha nasaun ne’e no serbisu esensiál seluk ne’ebé fó benefisiu ba ema hotu.

“Relatóriu ne’ebé ami hato’o mak polítika justisa iha rai-laran, serbisu investigasaun sira ne’ebé dadaun ne’e la’o hela, konsellu jerál kona-ba investigadór sira nian oinsa atu konsolida serbisu investigasaun kriminál nian, ida mós oinsa atu proteje ita nia maluk sira iha prizaun,” Ministru ne’e tenik.

Iha oportunidade ne’e, Xefe Governu orienta membru Governu rua ne’e no SNI atu iha koordenasaun ida metin liu atu haree situasaun sira la’o iha Timor-Leste liuliu setór justisa, seguransa no serbisu informasaun intelijensia nian.

“Orienta ami serbisu ho koordenasaun di’ak, nune’e bele iha informasaun ne’ebé ho loloos atu halo atuasaun nune’e labele hamosu krime iha ita nia nasaun,” nia konklui.

Jornalista: Hortencio Sanchez

Editór       : Florencio Miranda Ximenes

iklan
iklan

Leave a Reply

iklan
error: Content is protected !!