Kopa Xanana: Laisorulai ‘tebesai’ Assa ho golu úniku
DILI, 24 juñu 2024 (TATOLI) – Ekipa istimadu husi Munisípiu Baucau Laisorulai FC susesu iha nia jornada hodi ‘tebesai’ adversáriu Assa FC ho golu úniku 1-0, iha jogu ikus faze 16 finál kopa Maun Boot Kay Rala Xanana Gusmão ne’ebé realiza iha Estádiu Munisipál Dili, segunda loraik ne’e.
Bainhira jogu la’o ekipa rua lansa kedan kontra no atake ba malu tuir tékniku no abilidade ekipa idaidak nian, oinsa buka golu ba sira nia ekipa.
Assa ho ambisaun oinsa manán jogu ne’e, jogadór sira lansa atake ne’ebé maka’as hasoru Laisorulai, maibé Laisorulai la nonok tenta responde atake ne’ebé Assa halo.
Ikus Laisorulai tenke hamate Assa nia jogu, nune’e Laisorulai foti hikas pozisaun hodi hatudu jogu ne’ebé brillante halo Assa susar atu domina bola. Assa nia lina oin, jogadór avansadu susar atu hetan bola nune’e bele prodús golu.
Laisorulai nia avansadu tenta ho maneira jogu oioin, maibé seidauk iha oportunidade halo golu tanba defeza Assa dudu la ba no metin tebes. Ho nune’e minutu primeira parte termina laiha golu ruma akontese ekipa rua provijoriu hela ho empata 0-0.
Dolar ba segunda parte ekipa rua kontinua lansa kontra no atake ne’ebé adekuadu, maibé Laisorulai domina liu bola husi lina kotuk ba to’o oin halo Assa araska hatudu jogu.
Adeptus Laisorulai nian hamrik nakonu iha tribun leten, hakilar ho lian oioin fó suporta másimu ba sira nia ekipa favoritu, adeptus Assa nian tur ho nonok sikat le’et iha klaran hodi hateke ho lian nonok.
Domina iha kampo laran ho bola kabuar la saugati ba Laisorulai tanba iha minutu 49 jogadór Martinho Belo (23) konsege lansa ona golu primeiru hodi muda rezultadu ba 1-0. Golu ne’e hasa’e liutan intensidade jogu Laisorulai nian, sira halo presaun hasoru Assa, halo Assa lian laiha iha tribun no kampo laran.
Minutu la’o ba oin, jogu mós la’o ba oin, Assa utiliza meiu hotu oinsa atu halo empata jogu ne’e, maibé Laisorulai la fó fatin nune’e Assa falla total iha lina finalidade.
Nune’e to’o minutu jogu nian termina, vitoria hela ba Laisorulai no Assa tenke hela ho derrora hodi fila ho tristeza. Vitoria ne’e lori Laisorulai haksoit ona ba oitavu finál hodi kontra Aimou FC iha semana oin.
Jornalista: Hortencio Sanchez
Editór: Florencio Miranda Ximenes
