iklan

JUSTISA, HEADLINE

PCIC suspende ona membru ne’ebé husu osan ba Fuzitivu Arnolfo nia oan

PCIC suspende ona membru ne’ebé husu osan ba Fuzitivu Arnolfo nia oan

Logotipu PCIC. Imajen/espesiál

DILI, 24 juñu 2024 (TATOLI) – Diretór Nasionál Polísia Sientífika Investigasaun Kriminál  (PCIC, sigla portugés), Vicente Fernandes e Brito, hateten PCIC foti ona desizaun suspendida ba membru PCIC ne’ebé husu osan ba Fuzitivu Arnolfo nia oan.

Nia dehan, rezutadu averiguasaun no investigasaun hatudu katak membru PCIC ne’e husu duni osan ba Fuzitivu Arnolfo nia oan, tanba ne’e investigadór sira rekomenda ba Diretór PCIC aplika sansaun disipliñar hodi suspende atividade funsaun ba membru PCIC ho insiál OdA.

“Oknum PCIC ho inisiál OdA agora ita aplika ona prosesu disipliñar, durante tinan ida labele servisu, agora nia hanesan vida sivil labele simu ona saláriu durante prosesu disipliñar ne’e la’o, tanba investigasaun sira ne’ebé iha hatudu katak iha duni faktu no prova katak membru PCIC ne’e husu duni osan ba família Fujitivu Arnolfo Teves Jr nia oan mane, entaun ita haree ba ida-ne’e, ita aplika pena disipliñar no nia labele halo ona atividade servisu ka ita bolu inatividade durante tinan ida”, Vicente Fernandes hateten ba jornalista sira bainhira partisipa iha abertura serimónia ezersísiu konjunta CARAT ne’ebé halo iha Estadium Munisipál Dili, segunda, ohin.

Diretór PCIC rejeita membru PCIC ho inisiál OdA kontinua simu nia saláriu hanesan membru PCIC.

“Agora nia saláriu ita suspende ona, maibé informasaun dehan fali nia sei simu saláriu, orsida ha’u sei konfirma lai, tanba nia hetan ona suspensaun tinan ida labele halo servisu hanesan membru PCIC, entaun nia lakon ona direitu regalia ba saláriu, kuandu nia kumpre ona sansaun disipliñar ne’e durante tinan ida nia, tama fali servisu entaun nia bele simu osan saláriu hanesan sira seluk”, nia konklui.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!