DILI, 25 juñu 2024 (TATOLI) – Jogu ba kopa Maun Boot Kay Rala Xanana Gusmão, haka’at ona ba faze oitavu finál, iha ne’ebé klube hamutuk ualu mak sei kompete hodi hada’u malu ba kuatru finál.
Jogu ba oitavu finál sei hala’o iha semana ne’e no termina iha semana oin kontinua kedan ba jogu kuartu finál.
Klube ualu ne’ebé konsege ultrapasa ba oitavu finál ne’e mak hanesan, Zhavia FC, Buradu FC, UEP FC, Aimou FC, Coach Eleven, Jomar FC, Warikoan FC no Laisorulai FC.
Tuir oráriu ne’ebé fó sai ona husi komisaun jogu mak hanesan, Zhavia vs Coach Eleven jogu sei realiza iha Estádiu Munisipál Dili iha loron 26 fulan-juñu 2024. Buradu FC vs Jomar FC iha loron 27 fulan-juñu 2024 iha Estádiu Munisipál Dili.
UEP FC vs Warikoan FC iha loron 01 fulan-jullu 2024 iha Estádiu Munisipál Dili. Aimou vs Laisorulai iha loron 02 jullu 2024 iha Estádiu Munisipál Dili.
Jogu ne’e hala’o hetan suporta másimu husi patrosinadór hanesan, BRI, Banku Mandiri, Telemor, Assosiasaun Xineza iha Timor-Leste, Virine Unipesoal Lda no Timor Gap.
Jogu ne’e primeiru lugar sei simu $8,000 osan fó husi BRI, ida ne’e BRI rasik mak entrega ba klube ne’ebé kampiaun. Segudu lugar sei simu $4,500 sei fó husi Telemor sira mak fó direita, terseiru lugar sei simu $3,000 osan sei fó husi Banku Mandiri. Kuartu lugar sei simu osan $2,000 osan fó husi Assosiasaun Xineza Timor-Leste sira mak sei entrega direita, osan ami komisaun la kaer.
Iha jogu ne’e tau mós osan ba mellor markadór hamutuk $600, mellor guarda rede no mellor klube sei simu $500 husi osan ne’e apoiu husi Timor Gap ho montante $1,000. Alende ne’e Delos mós apoiu osan hamutuk $1,000.
Jogu ne’e hetan mós apoiu orsamentu husi MJDAK hodi fó subsidiu ba árbitru ne’ebé dirije jogu no sosa mós materiál lojistika nian balu hodi suporta jogu ne’e durante fulan rua hahú maiu-juñu tinan ne’e.
Jornalista: Hortencio Sanchez
Editór: Florencio Miranda Ximenes
