DILI, 27 juñu 2024 (TATOLI) – Autoridade Inspesaun Fiskalizasaun Atividade Ekonómika, Sanitária no Alimentár (AIFAESA) husu ba Asosiasaun Emprezariál Xine iha Timor-Leste atu kumpre lei sira ne’ebé mak regula atividade ekonomia.
“Objetivu hosi enkontru ne’e atu divulga informasaun kona-ba kna’ar AIFAESA nianba operadór ekonomia sira, liuliu ba ita-nia maluk xineza sira ne’ebé mak iha ita-nia rain, tanba ita fó informasaun ba sira, maibé sira-nia prezensa menus, tanba kestaun kona-ba língua entaun sira ladún partisipa ho nune’e ha’u konvida sira atu bele partilla informasaun kna’ar AIFAESA nian hodi divulga lei sira ne’ebé mak regula kona-ba atividade ekonomia”, Ernesto Monteiro informa ba jornalista sira iha Bairo Pite, ohin.
Nia nota katak, xineza sira maioria menus akompaña lei sira ne’ebé iha AIFAESA nian.
“Ita halo semináriu ruma, xineza sira haruka de’it sira-nia traballadór sira mak mai, depois traballadór mai fahe atu esplika mós problema, tanba lingua xineza sira la hatene, entaun ida-ne’e mak sai preokupasan ba ita hotu nian, tanba ne’e mak ami mai iha ne’e fahe informasaun no lei sira ne’eba sira”, nia esplika.
Nia hateten, Asosiasaun Emprezariál Xines iha Timor-Leste, nia membru hamutuk 500-resin no sira-nia sidadaun ne’ebé mak iha Timor-Leste hamutuk rihun 15 ne’ebé mak hala’o knaar iha ne’e.
“Prezensa xineza nian ida agora daudaun ne’e menus, maibé ita tenta atu nune’e tempu tuir mai sira tenke partisipa másima, nune’e ita fahe informasaun ba sira bele kumpre, se la kumpre mak lei nafatin prega ba sira, maibé ha’u atu hato’o katak sira rasik ohin kompromete katak sira sei fahe ba sira-nia maluk sira liuliu sira ne’ebé mak ohin la marka prezensa iha ne’e”, nia relata.
Tanba ne’e, iha tinan 2017 mai to’o 2024, tantu timoroan no xineza hetan infransaun no selu koima ba Estadu hamutuk $638, 370.
Iha fatin hanesan, Prezidente Asosiasaun Emprezáriu Xineza iha Timor-Leste, Wei Yuan Qiong, agradese ba Inspitór AIFAESA ho nia ekipa ne’ebé mak mai sensibiliza informasaun relasiona ho atividade ekonomia nian, tanba ne’e sidadun xineza iha Timor Leste sei problema ba lingua maibé nafatin koopera ho Governu.
“Durante ne’e ha’u hato’o lei sira ne’ebé mak Timor-Leste nian ba membru sira atu la’o tuir, nune’e labele viola fali, tanba ne’e ha’u kompromete katak nafatin hato’o ba membru komersiante sira, tenke kumpre AIFAESA no lei ne’ebé mak vigora iha Timor-Leste”, Wei Yuan Qiong haktuir.
Nia subliña, trabalhadór timoroan ne’ebé mak servisu ho xines hamutuk rihun 20-resin iha Timor -Leste.
Jornalista : Felicidade Ximenes
Editór : Zezito Silva
