Top

FM husu Governu promove Edukasaun Sívika ba joven hodi evita tráfiku ilísitu droga

Fundasaun Mahein

DILI, 27 juñu 2024 (TATOLI) – Diretór Fundasaun (FM), Nelson Belo, husu ba Governu atu promove edukasaun sívika hodi konsiensializa joven sira atu hadok aan hosi droga.

“Ita atu halo prevensaun ba atividade droga iha ita-nia rai, meiu di’ak mak Governu tenke halo programa diariamente ba edukasaun sívika ba joven sira para konsensializa joven sira-nia hanoin hodi bele hadok sira nia aan hosi atividade droga ne’e. Segundu mak ne’e ita-nia instituisaun Estadu ne’ebé lei fó kompeténsia ba sira ba atu halo prevensaun ba droga sira tenke brani hodi ezekuta lei, labele halimar ho meiu sira, ita bele halo prevensaun ba atividade droga iha ita-nia rai”, Nelson Belo hateten ba TATOLI iha nia kna’ar fatin Bidau Lecidere, kinta ne’e.

Nia dehan, Timor-Leste dala barak implementa lei mak sei fraku tanba ne’e Fundasaun Mahein husu Governu tenke impoin lei ne’ebé iha ona ne’e ho rigorozu.

“Ita iha ona lei ba droga, ha’u husu ba Governu atu bele ezekuta lei ne’e ho rigór tanba lei ne’e iha para ita atu implementa no lei ne’e iha para regula ita. Laos lei ne’e ba ema ki’ik, enkuantu lei ba ema bo’ot la impoin. Kuandu bo’ot balun nia oan mak envole iha droga ne’e tenke impoin lei”, nia adianta.

Nelson hateten, Fundasaun Mahein mós halo advokasia ba joven sira kona-ba prevensaun atividade droga.

“Ami mós durante ne’e halo advokasia ba joven sira oinsa mak fo hanoin ba sira atu hadok aan hodi labele konsumu droga, tanba droga ne’e normalmente sei harahun sosiedade no futuru Timor-Leste”, nia dehan.

Nia dehan, juventude mak nu’udar futuru nasaun ida nian, tanba ne’e tempu ida agora presiza tau matan ba joven sira liuhosi edukasaun sívika ne’ebé envolve hosi ministériu hotu atu fó hanoin ba joven sira hodi prevene aan hosi atividade ilísitu droga.

“Edukasaun Sívika ne’e meiu importante atu ita prevene ita-nia joven husi atividade droga, Governu presiza halo edukasaun sívika ne’ebe envolve Ministériu Ineterior, Justisa no PNTL inkkui PCIC para fó hanoin joven sira atu sira bele hadok aan hosi atividade droga ne’e”, nia akresenta.

Belo husu ba joven sira atu hadok aan husi atividade droga tanba droga ne’e fó impaktu negativu ba saude ema nian no fó perigu vida.

“Juventude sira, imi mak futuru nasaun nian, kuidadu aan para labele monu ba lasu sira liuliu ba atividade ilísitu droga, prepara imi nia aan hodi tuir de’it atividade ne’ebé fó benefisiu ba imi hodi imi iha abilidade no kapasidade para bele sai kontinuadór hodi servi rai ida-ne’e”, nia konklui.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!