DILI, 27 juñu 2024 (TATOLI) – Ministru Administrasaun Estatál Tomás do Rosario Cabral, dehan Governu sei apoia karreta sia no motor rua ba reprezentante Santa Sé iha Timor-Leste hodi utiliza durante vizita Amu Papa.
Karreta sia ho motór rua mak ita sei entrega ba nunsiatura sira, hosi karreta sira ne’e sei utiliza espesiál ba sira 18 ne’ebé lao ho Amu Papa no rua sei utiliza hodi tula Amu Papa ba Tasi-Tolu inklui ho karreta ne’ebé hanaran karreta Papa movél ida no karreta ne’e ita mak hola, karreta movél ne’e, Amu Papa sei uza atu fó benesaun ba sarani sira.
”Karreta movél ne’e ita mak hola, nia dezeñu Vatikanu mak haruka mai no ita sei entrega iha dia nove setembru antes Amu Papa mai ”, Tomás Cabral dehan ba jornalista sira iha Sekretariadu Altu Nivél ba Vizita Amu Papa iha Motael, kinta ne’e.
Nia adianta, Komisaun Organizadora halo ona konkordánsia ho Patrimóniu Estadu hodi foti karreta mini-bus haat, automovél rua, mini-bus kiik ne’e rua no karreta sira ne’e sei entrega ofisialmente iha 9 setembru antes Amu Papa nia vizita.
Nia hateten, Indonézia mós apoia nia doutór sira iha ámbitu vizita Amu Papa iha Timor-Leste inklui Embaixadór Austrália sei apoia aviaun militár ne’ebé kompleta ho fasilidade saúde no aviaun ida-ne’e sei halo evakuasaun urjente karik iha ámbitu vizita Amu Papa ne’e iha buat ruma aviaun ne’e bele halo evakuasaun urjente.
“Aviaun militár Austrália ne’e kompleta ho fasilidade saude durante Amu Papa nia vizita, ne’e sira sei mai para iha ne’e, ka iha Dili ka iha Austrália ita sei halo konkordánsia”, nia subliña.
Governante ne’e hateten, konvidadu espesiál iha vizita Amu Papa mak Kardiál no Bispo 77 mak akompaña iha Papa nia vizita ne’e.
Kona-ba otél sira, nia dehan, otél sira ba konvidadu sira ne’e sufisiente.
“Ita prepra kondisaun Hotel Timor ba Kadial sira hotu de’it, Hotel Hilton ba jornalista 85, Novo Turismu, kuandu iha tan konvidadu espesiál tan iha bele lori sira ba Otel Timor Plaza, ne’ebé ita-nia kondisaun sufisiente hela”, nia dehan.
Kona-ba preparasaun, Tomás Cabral, hatete Governu preparadu atu simu Amu Papa mai Timor-Leste.
“Horseik Padre sira ho ekipa lojístika sira ba haree ona fatin ba misa, ami nia preparasaun lao di’ak los no iha loron 11 jullu 2024, ekipa liturjia Vaticano sei to’o iha Dili no sira nia estadia iha Dili to’o 13 jullu 2024.
“Ekipa liturjia sei mai no sei halo formasaun iha Tasi-Tolu, ekipa liturjia mai ho sira atu haree oinsá atu tau koru no oinsa atu media no sarani sira”, nia informa.
Ministru dehan, lahatene kareta Papa Movel hola ho orsamentu hira maibé hakarak klarifika de’it katak kareta Amu Papa sae iha nia kondisaun seguransa, ita labele publika buat ne’e.
Governu husu media nasionál tenke rejistu hafoin bele halo kobertura ba vizita Amu Papa
Iha biban ne’e, Ministru Tomás, husu ba media sira ne’ebé atu halo kobertura ba vizita Amu Papa atu rejista iha online, nune’e mak foin bele asesu informasaun.
“Imi tenke rejistu ona, imi tenke mai halo rejistu iha Sekretariadu Altu Nivél ba vizita Amo Papa nian, ita bo’ot sira bele tama iha sistema para aban bainrua ita bo’ot bele aseseu ba informasaun, se lae ita bo’ot labele asesu ba informasaun inklui halo movimentu. Sé imi la rejistu, imi laiha oportunidade atu tama, ne’ebé koordena ho señor Benigno tanba nia mak kaer media”, nia dehan.
Nia dehan, Governu sei estabelese midia center rua ida iha Tasi Tolu-no ida iha Hotel Hilton.
Jornalista: Natalino Costa
Editór : Zezito Silva
