DILI, 27 juñu 2024 (TATOLI) – Jurista Sergio Quintas husu ba Komisáriu Komisaun Anti-Korrupasaun (CAC, sigla portugés) Rui Pereira dos Santos, atu brani foti desizaun sira no livre husi intervensaun polítika sira hodi kombate korrupasaun.
“Ha’u hanoin Komisáriu CAC foun señor tenke hatudu nia brani entermu foti desizaun sira, tenke livre husi intervensaun polítika, labele hetan influénsia hosi polítiku atu bele kombate korrupasaun, se lae ita koalia prevensaun ba krime korrupasaun maibé labele tanba de’it ita la brani”, Sergio Quintas hateten ba TATOLI iha Tribunál Judisiál Primeira Instánsia Dili Colmera, kinta, ohin.
Nia dehan, Rui Pereira nu’udar figura ne’ebé di’ak tanba iha esperiénsia iha setór justisa ne’ebé inkestionavel.
“Ita lá kestiona maibé sai preokupasaun iha sosiedade nia leet mak ne’e, seraké nia bele halo kna’ar ho imparsialidade ka lae. Tanba krime korupsaun ne’e normalmente prátika hosi ukun nain sira ka governante sira, pergunta ba ita mak ne’e, nia brani hodi investiga governante sira bainhira iha indísiu ruma kona-ba krime korupsaun ka lae, ne’e sai dúvida bo’ot ba ita hotu. Ita espera katak ho Komisáriu CAC foun laos fó prioridade de’it ba prevensaun de’it, maibé tenke prioritiza mós meiu represaun sira”, nia afirma.
Jornalista: Natalino Costa
Editór : Zezito Silva
