Top

Supremu Tribunál Justisa deside halo estradisaun ba Fuzitivu Arnolfo Teves

Defeza Fujitivu Arnolfo Teves Jr, Advogadu Privadu José Ximenes ko'alia ho mídia. Imajen TATOLI/Natalino Costa

DILI, 28 juñu 2024 (TATOLI) – Supremu Tribunál Justisa liuhosi Juiza Jacinta Correia ne’ebé kaer kazu Fuzitivu Arnolfo Teves Jr hatún akordaun hodi deside estradita fuzitivu ba nia nasaun Filipina.

Supremu Tribunál Justisa foti desizaun ne’e bazeia ba entendimentu Tribunál katak faktu sira ne’ebé aprezenta hosi Ministériu Públiku ba krime ne’ebé imputa ba Fuzitivu Arnolfo Teves Jr durante iha prosesu audisaun, faktu sira provadu hotu katak Teves komete duni krime ne’ebé mak Ministériu Públiku imputa iha nia akuzasaun.

Tanba ne’e, Tribunál laiha dúvida no iha kinta (27/6) horseik deside hodi estradita Fuzitivu Arnolfo Teves Jr. ba fali nia nasaun orijen Filipina.

“Sim, desizaun ba ha’u-nia kliente sai ona. Supremu Tribunál deside katak halo estradisaun ba ha’u nia kliente”, Defeza hosi Fuzitivu Arnolfo Teves, Advogadu Privadu José Ximenes ba Tatoli via telephone, sesta ne’e.

Nia dehan, Supremu Tribunál Justisa fó tempu ba defeza hodi halo rekursu durante loron tolu nolu nia laran tuir lei haruka, hodi kontesta desizaun Tribunál nian molok halo estradisaun ba Fuzitivu Teves.

” Sim ha’u sei halo rekursu”, nia afirma.

Rekorda fali katak Supremu Tribunál Justisa fó prazu loron lima hodi Defeza hosi fuzitivu no Ministériu Publiku hato’o sira-nia alegasaun ba Tribunál atu haree antes foti desizaun.

Iha segunda (24/6) foin lalais ne’e, Defeza hosi Fuzitivu Arnolfo Teves, Advogadu Privadu José Ximenes hatama sira-nia alegasaun ba Supremu Tribunál Justisa. Supremu Tribunál Justisa iha kinta (27/6) horseik deside hodi estradita Fuzitivu Arnolfo Teves Jr. ba fali nia nasaun orijen.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!