Governu Korea apoia rihun $7 realiza Embaixada Taekwondo Cup
DILI, 30 juñu 2024 (TATOLI)– Governu Korea apoiu orsamentu rihun $7 liuhusi Federasaun Taekwondo Timor-Leste (FFTL), hodi realiza atividade Embaixada Taekwondo Cup durante loron rua (29-30/06/2024).
“Atividade Taekwondo nian durante loron rua, ne’ebé apoiu hosi Governu Korea no foin daudaun sira apoiu orsamentu rihun $7 ba atividade Embaixada CUP. Ohin ita haree atleta sira entuziasmu tebes hodi partisipa eventu ne’e,” Prezidensia FFTL, Gabriel da Costa, dehan iha GMT, Dili, domingu ne’e.
Prezidente FFTL hatutan, iha eventu ne’e fahe ba klase tolu, ida mak feto sénior hotu ho under 46, 49 no 53. Nune’e mós mane iha under 54, 58 ho under 63.
Maibé iha parte seluk, nia dehan aleinde atleta entuziasmu iha Taekwondo CUP maibé federasaun sente triste tanba ekipa atleta iha 61 de’it mak partisipa la hanesan bainbain.
“Bainbain ne’e atleta ne’ebé tuir atividade Taekwondo 100-200. Ita sempre tau informasaun liuhusi grupu WhatsApp maibé barak mak okupadu no tempu mós limitadu no deadline ne’e iha 25 juñu. Entaun 61 de’it mak partisipa,” nia katak.
Embaixadór Repúblika Korea mai Timor-Leste, Shin Mantaek, hateten Taekwondo ne’e dahuluk maihosi Lospalos depois ba Oecusse, entaun ho razaun ida-ne’e realiza Embaixada Taekwondo CUP iha Dili.
“Tanba ne’e ohin ita realiza embaixadór CUP ba dala 10 eventu Taekwondo ida-ne’e. Desportu Taekwondo ohin ne’e ba timoroan sira oinsá atu muda hahalok, ida-ne’e kompetisaun,” Embaixadór Repúblika Korea dehan.
Shin Mantaek enkoraja timoroan atu partisipa iha eventu Taekwondo internasionál.
Iha eventu ne’e, embaixadór iha esperansa katak Taekwondo Timor-Leste esforsu atu partisipa iha eventu internasionál. No Embaixada Korea esforsu maka’as nune’e realiza atividade hanesan ne’e iha tinan oin”, embaixadór Mantaek dehan.
Atleta hosi Ekipa Dragon, Julieta de Araújo, sente kontente tanba hetan primeiru lugár.
“Espera katak futuru ha’u bele nafatin esforsu hodi hela mellór atleta no ida-ne’e sai hanesan mehi ida mai ha’u iha futuru,” nia espresa.
Treinadór Ekipa Koni, Nilton Lemos, sente kontente ba rezultadu loron rua ba embaixadór CUP nian.
“Ami prepara durante fulan rua. Ida-ne’e mak sai rezultadu ne’ebé ami-nia ekipa Koni hatudu no ida-ne’e mak hosi ami-nia esforsu,” nia orgullu.
Atleta mellór Devinio da Costa, dehan atividade Taekwondo CUP ne’e motiva joven timoroan hotu atu partisipa nune’e bele hatudu iha mundu internasionál.
“Sai mellór atleta ne’e motiva ha’u hodi treinu ho másimu liután nune’e bele kompete iha internasionál,” nia tenik.
Atleta feto U-46 kg primeiru lugár ho naran Julieta de Araújo (Dragon), segundu lugar, Domingas Lein (Koni) no terseiru lugar, Zelia Carlos (Dolphin) no Indri Rente (LRN).
Atleta mane U-58kg primeiru lugár Jeferino da Silva (Koni), segundu lugár Leonardo da Silva (Dragon) no terseiru lugar Alfonso Miquelas (Lorico) ho Laudencio Ximenes (Lospalos).
Atleta feto U-53 kg hanesan primeiru lugár, Abriana Abílio (Koni), segundu lugar, Joiya Binsasi hosi Matadouro. terseiru lugár, Gelivalda da Silva Etya da Cruz (IPDC)
Atleta mane U-63kg primeiru lugar ho naran Vincencio Conceição (Lonito) segundu lugár, Vitorino Guterres (Baucau) no terseiru lugar, Anibal Filipe (Chaque) Delvidio Martins (Liquiçá).
Atleta feto U-49kg. primeiru lugár Carmella Tilman (matadouro), segundu lugar, Auliany Freitas (Dragon) no terseiru lugar, Renata Bevenove (ANFK) no Vadtrizya Amaral (Koni).
Atleta mane-54 kg primeiru lugar, Devivo da Costa (kol), segundu lugár: Gregório Soares (Hoypalon) no terseiru lugár, Jose Jaya Kunera axias no João Alves (Aniu-fuik).
Primeiru lugár (Koni), hetan premiu emas haat, ho perunggu ida. Segundu lugar (Dragon), ema ida ho perak rua. Terseiru lugár (Matadouro), ema ida ho perunggu ida.
Hosi atividade embaixadór Taekwondo Cup nian ba atleta mellór feto mak Julieta de Araújo no atleta mellór mane mak Devinio da Costa.
Jornalista : Osória Marques
Editór: Evaristo Soares Martins
