Governu planeia loke konkursu ba dezeñu konstrusaun Prizaun Weberec

DILI, 01 jullu 2024 (TATOLI) – Ministru Justisa Sergio Hornai, planeia ona, iha tinan ida-ne’e sei loke konkursu ba empreza ne’ebé mak atu halo dezeñu ba konstrusaun Prizaun Weberec.
“Ita bo’ot sira hatene prioridade Ministériu Justisa tinan ida-ne’e mak konstrusaun Prizaun Weberec, konstrusaun ba Sentru Juvenil no reabilitasaun ba moru Prizaun Gleno. Kona-ba konstrusaun Prizaun Weberec iha Same ita-nia ekipa Ministériu Justisa halo hela estudu viabilidade no halo ona levantamentu rai iha fatin ne’ebé ita atu konstrui prizaun ne’e, agora ita submete ba prosesu aprovizionementu hodi loke konkursu ba dezeñu. Kuandu prosesu sira ne’e hotu ona, entaun ita loke konkursu ba kompañia ne’ebé atu halo obra ida-ne’e”, Sergio Hornai hateten ba jornalista sira hafoin enkontru Konsellu Konsultivu Ministériu Justisa ne’ebé halo iha salaun MJ Colmera, Segunda, ohin.
Nia dehan, Ministériu Justisa aposta orsamentu ho totál millaun ida atu uza hodi konstrui Prizaun Weberec.
“Prosesu ida-ne’e, ita hahú faze oor faze husi estudu viabilidade, levantamentu ba rai, dezeñu prototipu ba konstrusaun Prizaun Weberec bainhira prosesu sira ne’e konklui ona mak ita foin avansa ba prosesu aprovizionamentu hodi loke konkursu ba empreza ne’ebé atu kaer obra ida-ne’e no orsamentu ba ida ne’e bo’ot iha miliaun ida”, nia afirma.
Nia dehan, Ministériu Justisa forma ekipa tékniku ida atu trata ba asuntu ida-ne’e.
“Ita iha ekipa tékniku ida mak sei tau matan ba ida-ne’e, ha’u espera katak tinan oin ita bele realiza kontrusaun ida-ne’e”, nia konklui.
Jornalista: Natalino Costa
Editór : Zezito Silva

