Top

Ministériu Justisa ezekuta pursentu 44 husi OJE

Osan Dollar Amerikanu. Imajen/Espesiál

DILI, 01 jullu 2024 (TATOLI) – Ministru Justisa Sergio Hornai, hateten ezekusaun Orsamentu Jerál Estadu (OJE) 2024 ba Ministériu Justisa nian foin mak atinje pursentu 44.

“Ita iha ona trimestre daruak, Ministériu Justisa ninia ezekusaun ne’e atinje ona pursentu 44”, Sergio Hornai dehan ba jornalista sira hafoin enkontru Konsellu Konsultivu Ministériu Justisa ne’ebé halo iha salaun MJ Colmera, segunda, ohin.

Totál orsamentu ba tinan fiskál 2024 ba Ministériu Justisa hamutuk millaun $13.527.213, kompostu hosi saláriu no vensimentu $8.522 bens no servisu $3.869.046 no laiha osan ba tranferénsia, kapitál menór $9.15.250, enkuantu kapitál dezenvolvimentu $220.725.

“Orsamentu sira ne’e, ita ezekuta saláriu no vensimentu inklui bem servisu hodi selu ba ita-nia funsionáriu sira iha Ministériu Justisa. Iha kapitál menór ne’e balun mós ita halo ezekusaun ona liuliu ba fasililidde ne’ebé nesesita ba instituisaun inklui orsamentu kapitál dezenvolvimentu ne’e ita atu ezekuta ba prioridade tolu ne’ebé Ministériu Justisa iha ba tinan ida-ne’e mak  konstrusaun ba sentru juvenil, konstrusaun ba Prizaun Weberek iha Same no konstrusaun ba moru Prizaun iha Gleno”, nia adianta.

Governante ne’e fiar katak ezekusaun Ministériu Justisa iha fulan ikus tinan ne’e bele to’o meta ezekusaun orsamentu nian.

“Ha’u hanoin iha fulan ida-ne’e bele atinje ezekusaun pursentu 50 no antes fim do ano ida-ne’e ita bele to’o iha tarjetu ezekusaun orsamentu nian, tanba Ministériu Justisa iha prioridade tolu ne’ebé sei implementa iha tinan ne’e”, nia konklui.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!