Dosente na’in-tolu sai arguidu iha Tribunál ba kazu abuzu konfiansa

DILI, 02 jullu 2024 (TATOLI) – Tribunál Primeiru Instánsia Dili (TJPID) iha tersa (02/7) ohin, halo julgamentu ba kazu abuzu konfiansa ne’ebé envolve hosi dosente na’in-tolu husi Universidade da Paz (UNPAZ) ho inisiál JGS, FTB no MLSdS.
Tuir faktu ne’ebé arrola husi Ministériu Públiku katak kazu ne’e akontese iha 2018, bainhira arguidu JGS ba halo lavantamentu osan ba Universidade da Paz nian iha BNCTL ho montante $60.000 atu selu saláriu ba dosente sira iha UNPAZ.
Maibé husi osan montante ne’ebé mak mensiona, matebian Reitór Lucas uza tiha $50.000 halo viajen ba rai li’ur no hola sasan seluk, maibé laiha relatóriu ezekusaun ba osan refere. Osan ho montante $10.000 mak arguidu JGS halo relatóriu no ba entrega iha Departamentu Finansa Universidade da Paz hodi halo pagamentu ba saláriu dosente sira.
Arguidu JGS la halo relatóriu ruma ba ezekusaun osan $50.000. Bainhira Reitór Lucas mate iha setembru 2019 mak estrutura reitoria foun UNPAZ nian husu arguidu atu relata ezekusaun osan ho montante $60.000 mak arguidu JGS foin justifika katak osan ho montante $60.000 nia mak halo levantamentu no $50.000 nia fó ba matebian Reitór Lucas mak uza hodi hola sasan ba universidade.
Enkuantu arguidu FTB no MLSdS tuir faktu husi Ministériu Públiku nian katak arguidu nai’n-rua loke konta bankaria eskola paraleleu UNPAZ nian iha Suai, laos lori naran universidade maibé uza fali ba sira-nia naran rasik.
Arguidu sira hatene katak hahalok ne’ebé arguidu sira halo ne’e krime no sei hetan punisaun, maibé arguidu sira lakonsiente no kontinua halo hahalok sira ne’e. Nune’e Ministériu Públiku Konstitui JGS, FTB no MLSdS ba arguidu ho forma konsumadu ba krime abuza konfiansa ne’ebé previstu artigu 257 hosi Kóndigu Penál Timor-Leste.
Hatan ba kazu ida-ne’e, Arguidu JGS hato’o nia depoimentu ba iha Tribunál katak momentu iha 2018 arguidu asume kargu hanesan Vise-Reitór ba asuntu Estudantil iha UNPAZ no momentu ne’ebá nia hetan orientasaun hosi Reitór UNPAZ atu halo levantamentu ba osan Univesidade nian iha banku BCNTL ho montante $60.000 atu selu saláriu dosente sira. Tanba momentu ne’ebá dosente barak ladauk simu saláriu tanba estudante sira selu proprinas tarde.
“Momentu ne’e Reitór Lucas mak orienta ha’u ba halo lavantamentu ba osan Universidade da Paz nian ne’ebé mak iha Banku BNCTL ho montante $ 60.000 no osan ne’e ha’u rasik mak ba halo levantamentu no ha’u rasik mak lori mai iha universidade ho montante$ 60.000”, Arguidu JGS hateten iha sala audiénsia julgamentu.
Arguidu deklara katak bainhira nia lori tiha osan ne’e mai UNPAZ, Reitór Lucas husu ba nia atu fó $50.000 atu uza hodi halo viajen ba rai li’ur.
“Reitór husu ba ha’u katak osan ne’e ó halo ona levantamentu karik fó hela $50.000 para aban ha’u atu sai ba li’ur. Entaun momentu ne’e ha’u dehan ba nia, osan ha’u foti ona iha ne’e no ha’u entrega osan ho montante $50.000 ba Reitór no 10.000 mak ha’u entrega parte Finasa Universidade atu halo pagamentu saláriu ba dorsente sira”, nia adianta.
Arguidu rekoñese katak osan ho montante $10.000 mak nia halo relatóriu ezekusaun enkuantu osan ho montante $50.000 ne’ebé nia entrega ba Reitór ne’e la halo relatóriu tanba lahatene reitór uza osan bas aida.
“Ha’u la halo relatóriu ba osan ne’e no ha’u labrani husu ba Reitór katak osan ne’e Reitór uza ba saida. Maibé kuandu Reitór husu osan hanesan ne’e pasti nia uza ba instituaun nia nesesidade no ami fiar no ha’u iha konfiansa ba Reitór katak Reitór halo duni ida-ne’e. Tanba nia hatudu tiha ona katak UNPAZ durante nia jere buat hotu lao di’ak, tanba ne’e mak kuandu nia husu osan ami entrga ba nia laliu hosi termu entrega no laiha relatóriu ruma ba ida-ne’e no nein husu tuir osan ne’e ba halo saida”, nia afirma.
Hafoin Tribunál rona tiha arguidu nia depoimentu, Tribunál marka fali ba loron 7 jullu 2024 oras tuku 14:00 loraik hodi kontinua rona deklarasaun hosi arguidu FTB no MLSdS.
Jornalista: Natalino Costa
Editór : Zezito Silva

