Tribunál aplika pena prizaun tinan 20 ba arguidu ECCD

DILI, 02 jullu 2024 (TATOLI) – Tribunál Primeiru Instánsia Dili (TJPID) iha tersa (02/7) ohin, liuhosi Juiz Prosesu José Gonçalves le sai akordaun hodi deside arguidu ECCD ho pena prizaun tinan 20 tanba faktu provadu katak arguidu mak oho duni matebian Bejamin Martins no taa Nelson iha Postu Letefoho hosi Munisípiu Ermera iha 2023.
“Bazeia ba depoimentu hosi arguidu nian durante aprezentasaun iha audiénsia julgamentu ba prosesu ida-ne’e, arguidu konfesa parsialmente ba Tribunál katak nia mak halo duni asaun hodi hamate matebian Benjamin no hakanek lezadu Nelson tanba momentu ne’e nia deskontroladu ba nia aan tanba nervozu. Tanba ne’e Tribunál laiha duvida hodi fó pena prizaun tinan rua nulu ba arguidu no husu arguidu iha obrigasaun atu fó osan rihun lima ba matebian Benjamin nia fen no atus lima ba lezadu Nelson tanba ho hahalok arguidu hakanek arguidu Nelson iha momentu ne’ebá”, José Gonçalves le sai akordaun iha sala julgamentu Tribunál Judisiál Primeiru Instánsia.
Juiz José haktuir katak faktu sira provadu katak krime ne’ebé Ministériu Públiku imputa ba arguidu komete krime ne’ebé Ministériu Públiku akuza ba arguidu.
“Faktu mós provadu hotu katak arguidu komete omisídiu agravadu ne’ebé previstu iha artigu 139 hosi Kódigu Penál Timor-Leste ne’ebé hakarek iha akuzasaun Ministériu Públiku nian. Ida-ne’e mak desizaun husi Tribunál, ha’u deklara ensera audiénsia ida-ne’e”, nia afirma.
Tuir faktu husi Ministériu Públiku katak arguidu ECCD halo asaun hodi oho matebian Benjamin Martin no taa kanek Nelson Martins iha aldeia Fahi Luhan, Suku Catrai Leten, Postu Administrativu Letefoho Munisípiu Ermera tinan kotuk.
Kazu ne’e akontese iha 7 setembru 2023, iha oras tuku 10:00 iha Aldeia Fahi Luan bainhira arguidu partisipa serimónia fase labarik nia matan, mak mosu diskusaun to’o iha dezentendimentu, arguidu nervozu foti katana hodi taa Lezada Nelson inklui matebian Benjamin to’o mate fatin. Ho hahalok arguidu nian, Ministériu Públiku imputa krime ho forma tentada ne’ebé previstu iha artigu 139 hosi Kódigu Penál Timor-Leste.
Jornalista: Natalino Costa
Editór : Zezito Silva

