Komandu PNTL sei foti medida disipliñar ba Superintendente Julia da Gama

DILI, 03 jullu 2024 (TATOLI) – Komandante Jerál Polísia Nasionál Timor-Leste (PNTL), Komisáriu Jerál Polísia Henrique da Costa, hateten Komandu sei toma medida hodi aplika sansaun disipliñar hasoru Superintendente Julia da Gama tanba halo intervensaun ba servisu Polísia nian.
Kazu ne’e akontese iha domingu (23/6) foin lalais ne’e, bainhira iha jogu Portugal kontra Turki iha ne’ebé Portugal manán ho golu tolu, nune’e adeptu sira halo komboiu no iha momentu ne’e Superintendente Polísia Julia da Gama nia oan ho naran Gleno tula nia kolega na’in-rua ne’ebé la uza kapasete hodi tuir mós komboiu. Iha momentu ne’ebá, polísia sira halo kedan atuasaun ba sira tanba la uza kapasete no deskonfia polísia baku sidadaun Gleno ho stick to’o kotuk laran metan.
Ho akontesimentu ida-ne’e, Superintendente Polísia Julia da Gama nudar inan husi Gleno lamenta ba atuasaun husi polísia nian no Ofisiál Superiór PNTL konsidera atuasaun ne’ebé polísia halo ba nia oan ne’e la profisionál, tanba nia oan ho nia kolega na’in-rua sei minoridade hela, kuandu sira-nia atus mak viola buat ruma, polísia atua tuir regra atuasaun polísiál, laos halo atuasaun ho agresaun fízika hodi rezulta nia oan hetan pankada grave.
“Sim, Komandu sei fó sansaun disipiñar, maibé sei liuhosi prosesu hodi hatene ninia violasaun, tanba violasaun ne’e iha parte ida mós tanba ida-ne’e ita labele koalia de’it buat ida ne’ebé sei iha prosesu laran, prosesu hotu mak ita sei hatene ninian rezutadu”, Komisáriu Jerál Polísia Henrique da Costa hateten ba jornalista sira hafoin vizita Unidade Espesiál Polísia (UEP), Bairro Pite kuarta, ohin.
Henrique hateten, hanesan Komandante Jerál, kuandu membru sira halo servisu iha terenu, sira iha kompeténsia atu halo ida-ne’e.
“Ha’u labele impoin fila fali ha’u-nia problema partikulár ruma hatama fila fali ba ne’ebá atu nune’e hodi enfrakesa fila fali ha’u-nia instituisaun no ha’u nia membru sira ne’ebé mak halo servisu iha terenu”, nia afirma.
“Ha’u de’it la apoia ba ha’u-nia família sé de’it ne’ebé mak la kumpre regra ne’e, signifika katak ha’u rasik mós hanesan Komandante Jerál ka no ha’u rasik hanesan ofisiál Superiór ida, ha’u la kumpre lei ne’ebé mak em vigor”, nia adianta.
Nia hateten, ekipa husi Departamantu Disipliñar Komandu Jerál PNTL haree ona asuntu ne’e hodi halo prosesu investigasaun.
“Ita-nia ekipa parte disipliñar hala’o hela prosesu investigasaun, tantu disipliña ninian no mós kriminál. Ita lakohi atu intervene membru sira ne’ebé mak halo servisu iha terenu”, nia konklui.
Jornalista: Natalino Costa
Editór : Zezito Silva

