ME no KFP fó pose ba profesór kontratadu 192 iha Lautém

DILI, 03 jullu 2024 (TATOLI)-Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Domingos Lopes Lemos, hamutuk ho Prezidente Komisaun Funsaun Públika (KFP), Agostinho Letêncio, tersa ne’e, fó ona pose ba profesór kontratadu hamutuk 192 hodi sai permanente iha munisípiu Lautém.

“Iha tersa ne’e ita-nia profesór kontratadu ba ingresu espesiál no rejime karreira profesór 192 mak simu pose husi ME no KFP. Ita-nia profesór sira ne’e husi ensinu pre-eskolár no ensinu báziku inklui mós ensinu sekundáriu jerál,” Diretór Servisu Edukasaun Munisípiu Lautém, Anibal Fernandes, relata ba TATOLI, via telefone, kuarta ne’e.

Notísia Relevante :KFP garante transparánsia iha prosesu teste daruak bolsa kandidatu profesór

Ho serimonia toma pose ne’ebé maka Ministériu Edukasaun ho Komisaun Funsaun Públika (KFP), atribui ba profesór sira horiseik sei rezolve problema menus manorin na’in sira hodi hanorin alunu sira.

Sekretáriu Estadu Ensinu Sekundáriu Jerál no Ensinu Tékniku Vokasionál, Domingos Lopes Lemos, hateten pose ne’e atu legaliza profesór sira-nia estatutu hosi kontratadu ba iha permanente nune’e bele kontribui ba hadi’a kualidade edukasaun iha rai-laran.

“Knaar nu’udar funsionáriu públiku ne’e dever maka servisu, eduka no hanorin oan sira, tanba atu transforma Lautém nia oan ba di’ak, fundasaun mak Edukasaun,” Sekretaria Estadu.

Totál eskola iha Munisípiu Lautém hamutuk, 136. Pre-eskolár no ensinu báziku hamutuk 130, Ensinu Sekundáriu Jerál haat (4) no Ensinu  Sekundáriu Tékniku Vokasionál rua.

Notísia Relevante :Profesór 3.868 tama iha kategoria idozu no invalidéz

Jornalista:Osória Marques

Editór    : Agapito dos Santos