iklan

NASIONÁL, DESPORTU, DILI, HEADLINE

Manán Mushila 2-1, Relay semo ba semi-finál kopa FFTL

Manán Mushila 2-1, Relay semo ba semi-finál kopa FFTL

Jogu Futebol Kopa FFTL 2024, Laleia FC kontra Muchila, iha estadiun Munisípal Dili, kinta (04/07). Imajen Tatoli/Francisco Sony

DILI, 04 jullu 2024 (TATOLI) – Ekipa idéntiku husi Munisipiu Manatuto ho naran istimadu Relay Laleia FC susesu iha nia jornada oitavu finál ne’ebé kontra Mushila FC manán ho rezultadu 2-1, nune’e ekipa ne’e semo ona ba semi-finál kopa Federasaun Futeból Timor-Leste (FFTL).

Duelu entre ekipa rua realiza iha Estádiu Munisipál Dili, kinta loraik ne’e. Iha ne’ebé lide husi árbitru prinsipál Pedro Braga, juiz liña Filomeno da Silva, Gabriel Pereira no árbitru rezerva Gaspar Soares.

Bainhira jogu hala’o iha minutu primeira parte, armada rua lansa kedan kontra no atake ne’ebé maka’as ba malu tuir tékniku no abilidade ekipa idaidak nian.

Jogu Futebol Kopa FFTL 2024, Laleia FC kontra Muchila, iha estadiun Munisípal Dili, kinta (04/07). Imajen Tatoli/Francisco Sony

Relay ho ambisaun ne’ebé maka’as hakarak manán jogu ne’e, nune’e treinadór prinsipál Eduardu Pereira hamrik iha kampo ninin orienta jogadór sira atu labele lakon oportunidade no tenke joga ho ritmu ne’ebé nia orienta ona.

Mushila organiza husi nia asistente treinadór Van Basten mós la nonok hamrik iha kampo ninin fó orientasaun másimu ba jogadór sira atu hala’o jogu ho ritmu maka’as oinsa bele hamate Relay nia jogu.

Mushila hetan oportunidade barak maibé la konsege ezekuta ho di’ak, ikus tenke lakon oportunidade iha lina finalidade. Relay mós la fó nia frakeza ba Mushila, hatudu nia jogu ne’ebé bonitu oinsa bele realiza mehi ne’ebé klube hakarak ultrapasa ba semi-finál.

Mehi Relay seidauk akontese bainhira oportunidade barak avansadu hetan maibé sempre falla no salva tutuir husi guarda rede Mushila. Maske difisíl Relay utiliza meiu hotu oinsa manán bola.

Mushila joga ho modelu defensivu akompaña mós ofensivu oinsa bele prodús golu, maibé Relay nia jogadór maioria unidade no halo antisipasaun ne’ebé másimu taka dalan ba Mushila atu prodús golu.

Jogu la’o to’o minutu 42 maibé seidauk prodús golu ruma husi ekipa rua, Relay halo mudansa ba estratejia jogu, ikus iha minutu 45 hatudu duni rezultadu ne’ebé di’ak liu husi jogadór mediu José Pereira (5) lansa sutu dook ida husi kampo klaran halo guarda Mushila Egso Caldes (12) la antisipa ho di’ak bola tama liu-ba rede laran muda kedan rezultadu ba 1-0.

Golu ne’e hanesan golu ikus ba ekipa rua tanba to’o minutu primeira parte termina laiha tan golu ruma akontese, nune’e Relay provijoriu lidera jogu 1-0.

Haka’at ba segunda parte ekipa rua nafatin lansa kontra no atake ne’ebé másimu ba malu, Mushila esforsu maka’as oinsa halo empata jogu ne’e. Ikus esforsu ne’ebé Mushila halo la hela de’it hanesan esforsu tanba iha minutu 46 bola barullu iha lina oin Relay nian halo defeza Relay Almerito da Silva (13) hanesan mós kapitaun la antisipa ho di’ak ikus nia tenke hatama rasik bola ba rede Relay nian hodi muda rezultadu ba 1-1.

Golu ne’e komesa atu hakoi ona mehi Relay nian tanba Mushila halo atake ne’ebé adekuadu kontra Relay, maibé ho esperiensia jogu ne’ebé Relay iha la fó fatin ba Mushila atu aumenta golu.

Jogu la’o manas liutan husi minutu ba minitu, Relay esforsu-aan maka’as oinsa manán jogu ne’e. Jogadór hotu haka’as aan maka’as oinsa hatama golu. Ikus iha minutu 76 jogadór José Pereira lansa tan golu ikus muda kedan rezultadu ba 2-1 hodi homan kedan Relay nia mehi haka’at ba semi-finál.

Golu ne’e hamonu kedan mentalidade Mushila nian tanba lakon jogu barak. Relay joga ho kalma hodi hein oras jogu termina bele manán ona jogu ne’e. Ikus minutu 90 termina laiha tan golu ruma mak Mushila halo vitoria prega metin kedan ba Relay hodi iha direitu absoluta ba semi-finál.

Tuir orariu ne’ebé fó sai ona husi FFTL, iha loron 05/07 iha Estádiu Munisipál Dili iha jogu oitavu finál ne’ebé sei kontra malu entre DIT FC no Assa FC bainhira ekipa ida manán sei kontra Relay iha semi-finál.

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!