DILI, 04 jullu 2024 (TATOLI) – Ministériu Komérsiu no Indústria (MCI) hamutuk ho nia estrutura realiza semináriu vizualizasaun interna ba pesoál MCI tomak ho objetivu atu aliña integrasaun ekonómika rejionál no globál.
Ministru MCI, Filipus Nino Pereira, hateten semináriu vizualizasaun interna nian krusiál tebes ba MCI nia estrutura atu funsionáriu hotu bele asume responsabilidade koletiva, iha intensaun di’ak iha aliñamentu integrasaun ekonómika rejionál no globál ne’ebé maka MCI atinje ona durante tempu ida-ne’e.
“Ita alkansa ona progresu barak liu iha setór ekonomia ne’ebé Timor–Leste integra ona Organizasaun Mundiál Komérsiu (WTO) no Asosiasaun Nasaun Sudeste Aziátiku (ASEAN), nune’e pesoál hotu iha MCI presiza hatene ida-ne’e atu bele asume responsabilidade koletiva atu serbisu di’ak liután iha futuru”, Ministru MCI Filipus Nino Pereira hatete ba jornalista sira iha Timor–Plaza iha loron-kinta ne’e.
Nia dehan, progresu lubuk ida ne’ebé durante ne’e MCI hala’o ona iha ne’ebé servisu hamutuk ho Ministériu Agrikultura no ministériu sira ne’ebé iha ligasaun, jere ba esportasaun no importasaun, aleinde ne’e fó apoiu mós ba setór privadu sira inklui atividade Empreza Mikro, Ki’ik no Média (MSMs ) atu aliña integrasaun ekonómika rejionál no globál iha diversifikasaun kresimentu ekonómiku iha Timor–Leste.
“Realizasaun progresu hothotu bele atualiza iha semináriu vizualizasaun internu ida-ne’e atu nune’e pesoál hothotu MCI nian bele iha informasaun no koñesimentu ne’ebé sufisiente oinsá atu serbisu ho di’ak iha aliñamentu integrasaun ekonómika rejionál no globál’’, nia hatete.
Nia husu ba pesoál MCI tomak atu foka liu ba semináriu liuhosi aumenta koñesimentu hodi serbisu ho profisionál liután iha aliñamentu integrasaun ekonómika rejionál no globál iha ASEAN no OMK nian.
Jornalista : Felicidade Ximenes
Editór : Zezito Silva
