UPM entrega mate isin Purwanto ne’ebé mout iha tasi ba Embaixada Indonézia

DILI, 04 jullu 2024 (TATOLI) – Unidade Polísia Marítima (UPM), entrega mate isin sidadaun Indonézia ida ho naran Purwanto ho Ró Artomo 2 ne’ebé mout iha tasi, área Atauro ba Embaixada Indonézia atu transporta nia mate isin ba fali nia nasaun orijen.

Ró kargo ida-ne’e, iha loron  tersa (2/7) foin lalais, iha tuku 10:00 dader, tula sasan materiál konstrusaun inklui lori tripulante 16 halo viajen hosi Surabaya atu ba Papua. Maibé to’o iha tasi Liran no Atauro nia klaran ró ne’e nia mákina avaria no rezulta ró ne’e mout hodi labele kontinua nia viajen ba fatin desitinadu.

Ho asidente ne’e, ondas no anin lori ró Artomo 2 mai to’o fali iha iha tasi área Atauro no komunidade sira Atauro iha (3/7) tuku 3:00 madrugada informa kedan asidente ne’e ba parte Unidade Polísia Marítima no Autoridade Protesaun Sivil Atauro katak ró ida mout iha área Liran no Atauro nia klaran.

UPM no Protesaun Sivil  halo kedan intervensaun hodi halo salvamentu ba ema 15 ne’ebé mak iha ró laran enkuantu ida mak buka la hetan.

Iha kinta (4/7), tuku 4:00 madrugada, komunidade Atauro ida hetan sidadaun Indonézia na’in ida ho kondisaun mate latan hela iha tasi, área Suku Maquili, Aldeia Fatulelo no informa kedan ba UPM no autoridade Protensaun Sivil atu transporte mate isin ne’e ba Dili.

Hafoin transporta, Komandante Interinu UPM Inspetór Xefe Polísia Aniceto da Silva de Fatima entrega kedan mate isin sidadaun Indonézia ne’e ba Embaixadór Indonézia iha Timor-Leste Octo Dorinos Manik ne’ebé partisipa hosi Sekretáriu Estadu Protesaun Sivil Domingos Mariano Reis.

Aniceito hateten, UPM hetan informasaun iha kuarta (7/7) horseik katak iha ró kargo ida hosi Indonézia tula sasan husi Surabaya atu ba Papua no lori ema hamutuk 16.

Maibé bainhira to’o iha área Tasi Liran no Atauro, ró hetan asidente no tuir informasaun ne’ebé iha katak tanba mákina avaria, entaun UPM simu kontatu no halo kedan intervensaun hodi halo salvamentu ba sidadaun sira iha ró ne’e nia laran.

“Entaun ita halo kedan atuasaun no haruka kedan membru sira ba to’o fatin ne’ebá bainhira membru UPM seidauk to’o fatin sidadaun sira ne’ebé iha ró laran, balun hahú buka salva nia aan hodi nani hasoru ita-nia UPM no ita-nia UPM konsege halo salvamentu ba sidadaun 15 ne’ebé iha ró ne’e hodi lori mai iha Kuartel UPM no iha sidadaun ida mak lakon no momentu ita buka tuir nafatin no ohin ita konsege hetan fali no sidadaun ne’e agora nia isin mate, ita entrega ona ba Embaixada Indonézia nian iha Timor-Leste atu halo prosesu kontinuasaun”, Inspetór Xefe Polísia Aniceto hateten ba jornalista sira iha Kuartel UPM, kinta ne’e.

Nia hateten, mate isin sidadaun Indonézia ne’e hetan iha área tasi ibun Maquili kuaze metru 50 hosi tasi ibun ba laran.

Iha fatin hanesan, Sidaun Atauro Francisco de Araujo mak hetan mate isin bainhira nia ró lao hela iha tasi laran, derepente nia haree sidadaun Indonézia latan hela iha fatuk ida ne’ebé laiha ona iis.

“Ha’u hetan mate isin ne’e iha kuatru oras madrugrada ohin, no nia sidadaun ne’ebé iha ró kargu ne’ebé mout iha tasi entre Liran no Atauro nian ho nune’e ha’u kontatu kedan ba UPM no ohin ita transporta kedan nia mai iha ne’e”, nia haktuir.

Sekretáriu Estadu Protesaun Sivil  Domingos Mariano Reis, dehan Governu fó solidariedade ba vítima ne’ebé hetan asidente.

“Reprezenta IX Governu Konstitusionál hato’o solidaridade klean ba vítima ne’ebé hetan asidente iha tasi no ita sei fó asisténsia saúde ba sira no aban bainrua ita sei koordena atu lori sira ba fali sira-nia rai”, nia afirma.

Embaixadór Octo Dorinos Manik kongratula ba  Unidade Polísia Marítima tanba ho sira-nia servisu bele halo salvamentu ba sidadaun Indonézia 15 ne’ebé ho di’ak no iha ida mak mate.

“Ne’e hatudu relasaun Indonézia ho Timor-Leste laos iha nivel polítika bilaterál de’it maibé husi ema ba ema mós rai rua ne’e iha hatudu relasaun ne’ebé di’ak los, ida-ne’e hatudu ita iha relasaun ne’ebé di’ak tanba kuandu sidadaun Indonézia mak hetan problema iha tasi entaun autoridade iha ne’e bele halo salvamentu hanesan mós kuandu sidadaun timoroan mak hetan asidente iha tasi área Liran entaun husi Indonézia bele ajuda”, nia konklui.

Diplomata agradese ba Unidade Polísia Marítima tanba bele hetan osan sidadaun Indonézia ne’ebé mate tanba asidente ró iha tasi laran no tempu badak husi Embaixada Indonézia sei kooderna hodi lori fila sidadaun 15 ne’ebé salva iha asidente ne’e inklui mate isin ba fali Indonézia.

Jornalista : Natalino Costa        

Editór : Zezito Silva