DILI, 05 jullu 2024 (TATOLI) –Primeiru-Ministru (PM), Kay Rala Xanana Gusmão, entrega uma andár ida ho medida 9×6 ba família Cesaltina Soares ho Celestino Kobo, iha aldeia 4 Setembru, Malinamuk, suku Comoro, postu administrativu Dom Aleixo, munsípiu Dili, foin lalais ne’e.
Uma ne’e hahú konstrui voluntariamente hosi timoroan sira ne’ebé halibur aan iha Asosiasaun Movimentu Brigada Xanana (AMBX) iha 29 fulan-abríl 2024 durante fulan ida semana rua no ohin konsege realiza serimónia entrega.
Durante membru AMBX hala’o serbisu voluntáriu, Gabinete Apoiu Sosiedade Sivíl Prezidénsia Repúblika mak oferese hahán, karpintaria Satria mak oferese arus no odamatan ho jenela, inklui apoiu bee-moos hosi Bombeirus nasionál.
Iha seremonia entrega, Primeiru-Ministru, Xanana Gusmão, louva espíritu voluntarizmu hosi AMBX ne’ebé hanoin no halo asaun konkreta kona-bá Fraternidade Humana.
Xanana Gusmão louva tanba husi asaun ne’ebé membru sira AMBX halo hanesan kahur semente, foti fatuk, kahur rai henek, ne’e hanesan ezemplu di’ak tebtebes bá Fraternidade Humana.
Asaun ida-ne’e, Xanana konsidera katak la’ós tanba osan mak AMBX halo, maibé asaun tulun-malu ne’e tanba fraternidade humana.
“Ha’u lakohi fó parabéns maibé ha’u hakarak dehan, ha’u kontente loos ho imi-nia asaun ida-ne’e. Imi bele halo duni buat ruma. Ha’u mós sente katak imi hotu kontente ho saida mak imi halo. Ita hotu maka ne’e, prontu atu halo saida de’it, prontu halo buat ruma bá ema seluk nia presiza. Ne’e duni kontinua. Ha’u-nia haku’ak boot ba imi hotu, ha’u-nia domin no respeitu tomak bá ferik no katuas sira ne’ebé servisu makaas. Ida-ne’e imi hatudu fraternidade humana,” PM Xanana hateten, bainhira entrega uma ne’e ba familia Celestina.
Vise-Koodenadór Jerál AMBX, Americo Maia esplika, osan bá konstrusaun uma ne’e mai hosi osan privadu Primeiru-Ministru nian no AMBX la kaer osan, maibé membru sira servisu de’it ho voluntariamente tuir espíritu asosiasaun nian iha ohin no bá futuru.
Americo Maia konta-tuir katak, família ne’ebé hela iha uma-ne’e maka Cesaltina Soares hosi postu administrativu Uatulari, munisípiu Viqueque ho nia kaben Celestino Kobo hosi suku Taiboko, Sub Rejiaun Pante Makasar, Rejiaun Administrativa Espesiál Oecusse Ambeno (RAEOA) ho sira-nia oan na’in-tolu.
Antes ne’e, kazál ne’e hela iha área tasi ibun Bebonuk nian maibé hetan eviksaun hosi Estadu no laiha osan atu konstrui uma foun tanba sira halibur família hosi Oecusse no Viqueque hamutuk ema na’in-19, mesak maun, alin, primu, prima, subriñu no subriña iha ne’ebé balun eskola, balun servisu bada’en, balun hein loja, balun fa’an ikan no servisu seluk tán hodi buka moris iha Díli.
Bainhira hetan eviksaun, família ne’e laiha duni kbiit atu halo uma, nune’e bá hasoru direta Líder nasionál Kay Rala Xanana Gusmão katak sira iha duni rai privadu maibé husu de’it atu bele harii uma ida bá sira tanba ho kondisaun halibur ema barak hodi buka moris iha Díli.
Iha momentu ne’ebá, Primeiru-Ministru diretamente mobiliza ekipa AMBX hodi halo identifikasaun bá rai privadu ne’ebé família ne’e iha no konsolida kedan membru grupu servisu voluntáriu ne’e hodi harii uma bá familia ne’e.
Cesaltina Soares durante ne’e servisu hanesan ajudante ka empregada bá ema-nia servisu uma nian no Celestino Kobo servisu hanesan bada’en.
Cesaltina Soares agradese bá entidade hotu-hotu ne’ebé fó ona apoiu hodi halo konstrusaun bá uma ne’e, liuliu Primeiru-Ministru Kay Rala Xanana Gusmão.
Hanesan uma-na’in laiha lia-fuan atu deskreve hanesan sentidu agradesimentu, maibé deskreve ho matan-been no sentimentu emosionál ne’ebá kle’an tebes.
Uma ne’e hetan bensaun hosi Padre Roberto Kosat, SVD no marka prezensa iha serimónia entrega ne’e maka diretór nasionál bombeirus, autoridade lokál, membru AMBX, Pesoál Polísia Komunitária no família hosi uma-na’in.
Jornalista: Hortencio Sanchez
Editór: Florencio Miranda Ximenes
