DILI, 05 jullu 2024 (TATOLI) – Komandante eskuadra Dom Aleixo, Inspetór Xefe Polísia, Alexandrino da Costa, hateten komandante eskuadra hetan orientasaun hosi komandu munisípiu atu halo diálogu ho eskola sira iha área Dom Aleixo ninian atu kontribui ba pás no prevene ka labele halo krime iha eskola.
“Diálogu ida-ne’e bazeia ba orientasaun hosi Komandu Munisípiu Díli, atu realiza diálogu ba eskola sekundária ne’ebé pertense ba área juridisaun Postu Administrativu Dom Aleixo nian hodi estudante sira prevene ka labele halo krime iha eskola. Entaun ita ohin hahú diálogu ida-ne’e iha estudante sira iha eskola sekundária Finantil, tanba ita hatene katak eskola Finantil no eskola 10 Dezembru ne’e hanesan eskola ne’ebé mak estudante sira sempre halo konfrontu, entaun ho diálogu ida-ne’e ita mai fó hanoin ba sira katak nudar estudante konsentra de’it ba estudu no eskola ne’e, laos fatin ba voilénsia maibé fatin ba ensinu aprenndijazen”, Inspetór Xefe Polísia, Alexandrino da Costa, dehan ba jornalista sira hafoin diálogu ho estudante, iha Ai-Mutin sesta ne’e.
Nia dehan, hanesan joven buka hodi kapasita aan, aproveita oportunidade sira ne’ebé mak iha atu buka aprende hodi prepara aan di’ak liután iha future, la’os halo krime.
“Hanesan joven ka estudante, imi-nia tempu laos atu baku malu no kria problema, maibé hanesan joven ida agora buka aproveita tempu no oportunidade atu prepara imi-nia aan ba futuru ne’ebé di’ak liu”, nia adianta.
Inpetór Xefe Polísia, afirma diálogu konjunta, iha fulan ne’e nia laran sei bolu estudante hosi Finantil no 10 Dezembru atu fó hanoin ba sira katak hanesan estudante tenke kria pás iha eskola no prevene konflitu.
“Ami sei haree iha fulan ida-ne’e nia laran, ita sei halo diálogu ida ne’ebé sei envolve hosi estudante eskola Finantil tantu 10 Dezembru atu sira ba oin bele prevene krime, tanba sira ne’e mesak ita-nia alin no oan de’it, ita iha obrigasaun morál atu fó hanoin ba sira katak labele husik sira hodi evolve aan krime sira”, nia afirma.
Alex mós husu ba estudante sira, juventude no komunidade sira iha Postu Administrativu Dom Aleixo atu atu kontribui ba pás no estabilidade hodi fó susesu ba vizita Papa Francisco mai Timor-Leste.
“Ita hanesan populasaun ne’ebé mak maiória fiar iha relijiaun Katólika, ha’u husu ba imi joven sira, estudante sira no inan aman sira iha área Dom Aleixo nia hodi kontribui ba pás iha ita-nia rai atu ita fó susesu ba vizita Amo Papa mai Timor-Leste hodi bele lao di’ak, tanba seguransa laos iha polísia nia liman de’it maibé iha ita hotu nia liman”, nia fó-hanoin.
Iha fatin hanesan, Diretór Eskola Sekundaria Jerál Finantil, Aniceto Berlelo, hateten autoridade seguransa mai halo diálogu aberta ida ho estudante Finantil ho objetivu atu fó hanoin ba sira hodi prevene krime.
“Dala barak estudante sira ne’e mai eskola, dalaruma halo problema hodi halai tama fali eskola laran, to’o ema husi liur mós halo problema tama to’o aredór eskola nian no sira sai ba provoka malu to’o hamosu konfrontu, entaun situasaun sira ne’e mak halo ita ohin hamutuk iha ne’e para ita-nia polísia sira, autoridade lokál hodi fó hanoin mai ita estudante sira para sira prevene hahalok sira hanesan ne’e”, nia hateten.
Nia dehan, diálogu sira hanesan ne’e importante ba estudante sira tanba hanesan estudante presiza konsensializa aan hodi ba atividade pozitivu sira para hanesan koñesimentu no abilidade.
“Tempu agora laos buka atu problema, kria konfrontu iha fatin fatin, sé hanesan estudante mak ita konsiente katak ita-nia papél mak estudante no kapasita ita-nia aan liuhusi atividade pozitivu sira”, nia dehan.
Eskola Sekundária Jerál Finantil ho totál estudante 1.899 no iha profesór iha 67.
Xefe Suku Comoro, Eligio José Marçal, hateten hanesan autoridade Suku Comoro, apresia ho intensaun husi PNTL ne’ebé realiza enkontru ho estudante sira iha Finantil.
“Ida-ne’e, intensaun ne’ebé di’ak tebes, husi diálogu sira ne’e ita bele eduka ita-nia estudante sira hodi fó hanoin, motiva sira atu labele monu ba krime, ita hotu tenke iha hanoin di’ak no halo di’ak iha sosiedade nia leet hanesan estudante tenke iha espiritu respeitu malu hadomi malu”, nia dehan.
Nia husu mós ba estudante sira, joven no ema hotu atu kontribui ba pás iha sosiadade.
Jornalista: Natalino Costa
Editór : Zezito Silva
