iklan

JUSTISA, BAUCAU, HEADLINE, MUNISÍPIU

Edifísiu Notariadu Baucau iha faze konstrusaun

Edifísiu Notariadu Baucau iha faze konstrusaun

Área ne'ebé utiliza hodi konstrui edifísiu foun Konservatóriu Rejistu Notariadu Baucau, segunda (08/07/2024). Imajen TATOLI/Natalino Belo.

BAUCAU, 08 jullu 2024 (TATOLI) – Edifísiu Konservatóriu Rejistu Notariadu Baucau iha ona faze konstrusaun liuhusi orsamentu Programa Dezenvolvimentu Integradu Munisipál (PDIM) tinan-2024.

Diretora Serbisu Munisipál Konservatóriu Rejistu Notariadu Baucau, Justina das Neves Mendonça esplika, kompañia responsável hahú ona konstrusaun hafoin sai manán-na’in ba projetu konstrusaun referida hafoin edifísiu notariadu anteriór iha kondisaun grave nune’e Autoridade Baucau tinan ne’e deside aloka orsamentu hodi konstrui hikas nune’e iha kondisaun hodi halo atendimentu ba komunidade.

“Agradese, tanba espasu bele di’ak liután ba atendimentu iha serbisu rejistu notariadu munisípiu Baucau,” Diretora Konservatóriu Rejistu Notariadu Baucau hateten iha Vila Nova, segunda ne’e.

EdifÍsiu Notariadu Baucau sai prioridade liuhusi planu asaun anuál ne’ebé kada tinan sempre hetan atensaun husi Autoridade Baucau hanesan aprova iha enkontru nível Konsellu Konsultivu no Koordenasaun Munisipál dezde tinan 2015 tanba edifísiu anteriór hetan estragu inklui espasu ba atendimentu ne’ebé seidauk sufisiente.

Projetu referida tuir planu sei konstrui ho medida 15×17 m² kompostu hosi sala armazein ba ekipamentu, sala kada diresaun hamutuk hitu, fatin forma ba komunidade, varanda, saneamentu públiku ne’ebé bazea ba konseitu ema ho defisiénsia.

Iha projeitu ne’e, sei aumenta fasilidade komplementár hanesan postu seguransa, riin Bandeira Nasionál, jardín no fatin ba para transporte.

“Konstrusaun ne’e ho orsamentu husi autoridade munisipál liuhusi PDIM nian,” Justina Mendonça akresenta.

Projetu konstrusaun referida ezekuta husi kompañia lokál Sumber Urip Unipessóal Lda ho orsamentu $264,287.88, númeru kontratu 11/KDM-BCU/V/2024, no tuir planu sei remata iha loron-30 setembru 2024.

Notísia relevante: Notariadu Baucau suspende provizoriamente atendimentu pasaporte ba sidadaun

Jornalista   : Natalino Belo 

Editór          : Evaristo Soares Martins 

iklan
iklan

Leave a Reply

iklan
error: Content is protected !!