DILI, 08 jullu 2024 (TATOLI) – Vise Ministru Fortalesimentu Institusionál, Paulo Manuel dos Remédios, dehan Governu liuhosi Vise Ministru Fortalesimentu Institusionál forma ona ekipa traballu hodi diskute projetu proposta-lei kódigu rejistu sivíl.
Nia dehan, Ministériu Justisa nia ekipa tékniku mai husi Konservadór, Notáriu hanesan tékniku sira rejistu notariadu nian.
“Sim, ha’u halo pedidu ba grupu traballu ida ne’ebé envolve hosi Ministériu Justisa, Konservadór, Notáriu, tékniku sira iha rejistu notariadu hodi diskute kona-ba Kódigu Rejistu Sivil no iha fulan jullu ne’e nia-laran, sira sei aprezenta rezultadu diskusaun ne’e mai fali ha’u, hodi ami halo revizaun hamutuk durante semana ida nia-laran no ha’u mós sei enkontru ho konfisaun relijioza sira hodi konsulta ikus ho sira, tanba Konstituisaun RDTL hateten projetu direitu relijiaun sira, molok ha’u lori dekretu-lei Kódigu Rejistu Sivil ba aprezenta iha Konsellu Ministru”, Paulo Remédios ba jornalista sira hafoin lidera enkontru ho dirijente kargu xefia Ministériu Justisa ba definisaun Planu Asaun Anuál 2025 ne’ebé halo iha salaun Ministériu Justisa Colmera, segunda ne’e.
Nia esplika, Kódigu Rejistu Sivil la’os lei, maibé dekretu-lei ne’ebé mak aprova iha nivél Konsellu Ministru hodi husu autorizasaun ba Konsellu Ministru atu halo alterasaun hodi envia ba Parlamentu Nasionál ba artigu balun hosi Kódigu Sivil.
“Ita atu altera artigu balun husi Kódigu Sivil ne’e presiza dekretu-lei ne’ebé aprova husi Konsellu Ministru”, governante ne’e adianta.
Nia garante, dekretu-lei Kódigu Rejistu Sivil ne’e sei aprova iha tinan ne’e.
“Ha’u fiar katak dekretu-lei Kódigu Rejistu Sivil ne’e ita sei aprova iha tinan ne’e nia-laran”, nia afirma.
Jornalista: Natalino Costa
Editór : Zezito Silva
