DILI, 08 jullu 2024 (TATOLI) – Ministériu Justisa, ohin, diskute Planu Asaun Anuál (PAA) ba 2025.
“Sim, ohin, Ministériu Justisa realiza enkontru ho kargu xefia sira hodi halo diskusaun atu define Planu Asaun Anuál Ministériu Justisa ba tinan 2025’’, Vise Ministru Fortalesimentu Institusionál, Paulo Manuel dos Remédios, dehan ba jornalista sira iha Salaun Ministériu Justisa, Colmera.
Nia subliña, Ministériu Justisa foku ba servisu Terras Propriedade ninia, atu fó biban ba Diresaun Nasionál Terras Propriedade hodi kontinua halo levantamentu ba rai Estadu iha munisípiu, tanba rai barak mak sei iha problema, entaun tenke tau prioridade atu rezolve.
Ministériu mós diskute kona-ba solusaun ba atendimentu problema passaporte, hadia servisu konsevatóriu no notariadu iha tinan oin. Aleinde ne’e, diskute mós Sentru Formasaun Judisiáriu, partikularmente atu prodús autór judisiáriu sira ho kualidade.
“Enkontru ida-ne’e importante tebes ba kargu xefia sira no ba institusaun ne’ebé tutela iha Ministériu Justisa, atu ita bele tau hanoin hamutuk saida mak ita atu halo ih tinan oin. Tanba ita bo’ot sira hatene Komisaun Revizaun Orsamentu sei akontese iha dia 1 agustu 2024. Entaun husi enkontru ida-ne’e mak ita bele ba defende orsamentu ba ita-nia planu asaun ne’ebé ohin ami diskute ne’e iha KROP”, nia adianta.
Jornalista: Natalino Costa
Editór : Zezito Silva
