iklan

JUSTISA, HEADLINE

KFP husu kargu xefia uza karreta Estadu iha tempu ferias tenke ho orden servisu

KFP husu kargu xefia uza karreta Estadu iha tempu ferias tenke ho orden servisu

Komisariu Komisaun Funsaun Públika Agapito da Conceicao lidera ekipa konjunta ne'ebé kompostu husi Komisaun Funsaun Públika, Komisaun Anti Korrupsaun no Inspesaun Jerál Estadu halo vizita supreza ba Institutu Nasionál Farmasia no Produtu Mediksmentu iha tersa (9/7) ohin.Imajen Tatoli/Natalino Costa.

DILI, 09 jullu 2024 (TATOLI) – Komisáriu Komisaun Funsaun Públika (CFP, sigla portugés), Agapito da Conceição, husu ba kargu xefia sira husi instituisaun Estadu atu uza karreta iha tempu ferias no fim semana, sábadu ka domingu tenke ho orden servisu.

“Ha’u hanoin rezolusaun ida Governu hasai hodi bandu kargu xefia sira labele lori karreta ba para iha uma ne’e, rezolusaun ida-ne’e kontinua validu nafatin, seidauk halo alterasaun ruma tanba ne’e mak kuandu atu uza karreta Estadu halo servisu iha tempu feriadu ka ba fim semana sira ne’e tenke ho orden servisu, kuandu laiha orden servisu entaun ne’e labele”, Komisáriu Komisaun Funsaun Públika Agapito da Conceição dehan ba jornalista sira hafoin halo inspesaun iha Institutu Nasionál Farmásia no Produtu Medikamentu Kampung Alor, tersa ne’e.

Nia dehan, iha rezolusaun ne’e klaru katak karreta Estadu ne’e uza só ba oras servisu, kuandu fora husi oras tenke ho orden servisu.

“Kuandu iha kargu xefia ida mak viola hodi lahalo tuir ida-ne’e no nia uza karreta Estadu fora husi oras servisu mak laiha orden servisu ne’e mak kuandu tama iha pasa revista, polísia nia servisu tenke halo apreensaun”, nia dehan.

Nia dehan, rezolusaun ne’e bandu direjente husi instituisaun Estadu hodi lori karreta Estadu ne’e ba uma tanba sira hetan ona subsídiu alimentasaun husi Governu, tanba ne’e labele lori karreta ba uma.

“Agora dadaun iha ministériu balun, ami haree sira lori karreta Estadu to’o kalan, ita haree Ministériu Finansa, Ministériu Obras Públika, Ministériu Administrasaun Estatál, Ajénsia Nasionál Dezenvolvimentu no ministériu balun ne’ebé tama iha komisaun preparasaun vizita Amo Papa, entaun uza karreta Estadu ita labele jeneraliza, maibé servisu sira hanesan ita kontinua nafatin ho orden servisu para ita hetan problema ruma ita bele justifika”, nia adianta.

Komisáriu Agapito hateten, ekipa konjunta ne’ebé kompostu hosi Komisaun Funsaun Públika, Komisaun Anti-Korrupasaun no Inspesaun Jerál Estadu no Patrimóniu Estadu inklui Polísia Nasionál Timor-Leste kontinua halo inspesaun ba funsionáriu no kargu xefia sira ne’ebé uza patrimóniu Estadu ba uma.

Jornalista: Natalino Costa      

Editór : Zezito Silva

iklan
iklan

Leave a Reply

iklan
error: Content is protected !!