iklan

EDUKASAUN, HEADLINE

ME planu sosa komputadór 175 ba ESTV lima

ME planu sosa komputadór 175 ba ESTV lima

Diretór Nasionál Sekundáriu Jerál ME, Benjamin Fernandes. Imajen Tatoli/Osória Marques

DILI, 09 jullu 2024 (TATOLI)–Ministériu Edukasaun (ME) iha ona planu, iha tinan oin, atu sosa komputadór hamutuk unidade 175 ba Ensinu Sekundáriu Tékniku Vokasionál (ESTV) lima.

“Ministériu Edukasaun iha planu tinan 2025 sosa komputadór ba eskola lima, kada eskola ne’e ho komputadór unidade 35, ne’e laboratóriu iha ESTV ne’e mak hanesan ne’e, ne’ebé kada sala ida nia tenke hetan unidade 35 iha laboratóriu, ida-ne’e alunu sira uza ba prátika, liu-liu departamentu informátika,” Diretór Nasionál Sekundáriu Jerál ME, Benjamin Fernandes, informa ba Agência Tatoli, iha ninia knaar fatin, tersa ne’e.

Eskola lima ne’ebé sei hetan komputadór mak hanesan ESTV 28 Novembru Becora, Escola Secundária Técnica Vocacional-Grupo de Tecnologia e Indústria (ESTV-GTI) Becora, inklui ESTV Maliana, Ermera no Baucau.

“Eskola ESTV seluk mós sei sosa maibé ita sei sosa fazeadamente, ne’ebé tinan oin ne’e ita oferese uluk ba eskola lima ne’e ,” nia akresenta.

Notísia relevante : PD preokupa tanba ESTV sira seidauk simu osan konsensaun eskolár

ME aloka orsamentu $175.000 ba akizisaun komputadór 175, ne’ebé kada unidade ho kustu $1.000.

Iha sorin seluk, Diretór Ezekutivu Timor-Leste Coalition Education (TLCE), José Monteiro, konsidera, ESTV seidauk iha kapasidade kompetisaun tanba menus rekursu umanu, kualidade profesór no infraestrutura.

“Eskola tékniku vokasional seidauk iha kapasidade de kompetisaun, ein jerál maibé ne’e primeiru, tanba ami halo monitorizasaun ne’e ESTV iha dezafiu espesífiku sira hanesan infrastrutura, kualidade profesór, menus rekursu umanu, no ekipamentu prátika laiha,” nia relata.

Diretór Ezekutivu dehan, loloos ekipamentu prátika sira ne’e iha nune’e disponível ba profesór sira hanorin no estudante apreende hodi prátika.

“Ita-nia ekipamentu prátika laiha, fasilidade sira ne’e tenke disponível atu profesór sira hanorin no estudante sira uza hodi prátika. Kuaze eskola barak mak laiha, to’o Departementu Informátika sira ne’e mós iha komputadór rua de’it. Tanba ne’e, presiza fó hanoin ba Governu atubele fasilita fasilidade sira ne’e ba estudante sira,” nia tenik.

Jornalista    : Osória Marques

Editora         : Julia Chatarina

iklan
iklan

Leave a Reply

iklan
error: Content is protected !!