iklan

HEADLINE, SEGURANSA

Governu aloka millaun $11 konstrui Kuartel Jerál PNTL

Governu aloka millaun $11 konstrui Kuartel Jerál PNTL

Ekipa tékniku husi liña ministeriál ne'ebé kompostu husi Ministeriu Interior, Ministeriu Justisa, Ministeriu Obras Públika, Autoridade Munisípiu Dili, líder komunitariu Suku Caicoli no Komandu Jerál PNTL iha kuarta (10/7) ohin deskute konstrusaun edifisiu kuartel jerál PNTL. Foto Natalino Costa

DILI, 10 jullu 2024 (TATOLI) – Asesór Tékniku Ministériu Interiór, Marcelo Soares, hateten Governu prevee millaun $11 hodi halo konstrusaun ba Kuartel Jerál Polísia Nasionál Timor-Leste.

“Konstrusaun ba edifísiu Kuartel Jerál Polísia Nasionál Timor-Leste ne’e desde lansamentu primeira pedra iha 2019 no momentu ne’e kedan atu hahú ninia konstrusaun maibé lakonsege tanba iha uma-kain sia mak halo impedimentu tanba ne’e kazu ne’e to’o iha Tribunál no sidadaun sira ne’e manán iha Tribunál, nune’e prosesu konstrusaun ba edifísiu Kuartel PNTL paradu tiha. Entaun iha mandatu IX Governu Konstitusionál ida-ne’e iha kompromisu atu kontinua obra ne’e no konstrusaun ne’e sai prioridade no tinan ne’e tenke halo, tanba ne’e mak ita prevee ona orsamentu millaun $11 hodi halo konstrusaun”, Marcelo Soares hateten ba jornalista sira hafoin enkontru ho ekipa tékniku liña ministeriál ba konstrusaun edifísiu Kuartel Jerál PNTL, Caicoli, kuarta, ohin.

Nia dehan, orsamentu ba konstrusaun edifísiu Kuartel Jerál PNTL ho millaun $11 ne’e mai husi orsamentu Ministériu Interiór nia ne’ebé tau iha Fundu Infraestrutura.

Marcelo adianta, dezeñu ba konstrusaun edifísiu refere hetan ona aprovasaun husi Ajénsia Nasionál Dezenvolvimentu (ADN) no submete ona ba Komisaun Nasionál Aprovizionamentu hodi hein loke konkursu, atu empreza ne’ebé mak sai manán nain ba projetu ne’e bele hahú ona projetu ne’e.

Tanba ne’e, Ministru Interiór Francisco Guterres hamutuk ho Ministru Justisa Sergio Hornai inklui Komandante Jerál PNTL Komisáriu Jerál Polísia, Henrique da Costa akompaña husi Segundu Komandante Jerál PNTL, Komisáriu Polísia, Pedro Belo ho nia estrutra hotu hala’o ona sorumutu dahuluk iha fulan kotuk hodi hahú koalia kona-ba levantementu rai ne’ebé Komandu PNTL sei ba konstrusaun Kuartel Jerál PNTL inklui eskudara PNTL sira.

“Tanba ne’e ohin ami mai halo reuniaun entre liña ministeriál sira ne’ebé kompostu husi Ministériu Interiór, Komandu Jerál PNTL, Ministériu Obras Públika, KAFI no Terras Propriedade atu forma ekipa téknika ida atu nune’e iha fulan ida-ne’e ka fulan oin ita bele tún hodi halo levantamentu ba rai sira ne’ebé Komandu PNTL identifika ona atu halo konstrusaun Kuartel Jerál PNTL no eskudra PNTL sira” nia afirma.

Nia dehan, ba komunidade uma-kain sia ne’ebé mak hela iha rai Estadu ne’ebé pertense iha ne’ebá, ekipa liña ministeriál ne’ebé hola parte iha ekipa téknika sei koalia ho komunidade sira ne’e atu sira bele koopera hodi aselera konstrusaun.

“Ita haree obra konstrusaun Kuartel Jerál PNTL ne’e bo’ot tanba ne’e sei afeta ba komunidade uma-kain sia ne’ebé okupa hela rai ba konstrusaun Kuartel PNTL ne’e. Tuir ami-nia hatene iha uma-kain haat mak deklara sira mak rai nain, tanba ne’e momentu ne’ebá sira lori Komandu Jerál PNTL ba Tribunál no sira manán iha Tribunál”, nia informa.

Nia hatutan, iha komunidade uma-kain lima mak sai hanesan okupante ba rai ne’e.

“Maibé Governu liuhosi Minstériu Interiór husu ba ekipa tékniku sira atu ba halo levantamentu hodi koalia ho komunidade sira ho fuan ba fuan hodi nune’e kuandu sira sai husi sira-nia fatin karik tenke trata sira ho dignu”, nia dehan.

Marcelo Soares, kona-ba valór indeminizasaun ba sidadaun afetadu ba obra Kuartel Jerál PNTL, Governu seidauk bele define nia valór.

“Ha’u seidauk bele koalia kona-ba valór ganti rugi ba ita-nia sidadaun sira ne’ebé afeta ba konstrusaun ida-ne’e tanba ekipa téknika sira mak sei tún ba terenu hodi koalia kona-ba presu”, nia dehan.

Governu prepara ona dezeñu ba konstrusaun edifísiu Komandu Munisípiu sira no eskudara PNTL  

Iha biban ne’e, Asesór Tékniku Ministériu Interiór, Marcelo Soares, hateten, Ministériu Interior mós prepara ona dezeñu ba konstrusaun ba edifísiu Komandu Polísia Nasionál Timor-Leste (PNTL) iha munisípiu hotu inklui ba Eskuadra Polísia.

“Dezeñu ba konstrusaun ba edifísiu komandu munisípiu, tantu eskuadra polísia ne’e dezeñu prototipu no dezeñu ba ida-ne’e prontu hotu ona, hein de’it para ita prevee orsamentu atu ita hahú halo ona konstrusaun”, nia afirma.

Nia dehan, dezeñu ba edifísiu eskuadra polísia sira iha teritóriu nasionál, kuaze hanesan ho edifísiu eskudara PNTL Dom Aleixo.

Iha fatin hanesan, Komandante Komandu Administrasaun no Finansa, Komandu Jerál PNTL, Superintendente Xefe Polísia Natercia, hateten Governu iha kompromisu atu konstrui Kuartel Jerál PNTL, eskuadra polísia, kazerna, inklui armajen PNTL.

“Maibé ha’u atu dehan de’it katak konstrusaun kuartel jerál PNTL ne’e prioridade duni tanba ita bo’ot sira hatene kondisaun Kuartel Jerál PNTL ne’e aat ona no presiza duni polísia iha kondisaun ne’ebé di’ak iha kuartel ne’ebé ho kondisaun di’ak no dignu”, nia dehan.

Nia dehan, Komandu Jerál PNTL sei servisu hamutuk ho ekipa liña ministeriál sira seluk atu bele aselera konstrusaun Kuartel Jerál PNTL.

“Ha’u hanoin, karik buat hotu lao di’ak, tinan ne’e ita bele hahú ninia konstrusaun maibé depende ba ekipa téknika ne’ebé maka hola parte iha obra ida-ne’e”, nia afirma.

Diretór Jerál Terras Propriedade Lucas António da Costa, hateten Ministériu Justisa entrega ona rai ba Komandu Jerál PNTL atu konstrui Kuartel Jerál PNTL, atu halo kazerna PNTL, Eskuadra PNTL inklui armajen polísia.

Nia dehan, enkontru ida ohin ne’e nudar enkontru kontinuasaun entre Ministru Justisa Sergio Hornai ho Komandu Jerál PNTL ba atribuisaun rai ba konstrusaun edifísiu Kuartel Jerál PNTL, kazerna PNTL, atu halo eskruadra PNTL inklui armajen polísi.

Rai ne’ebé Komandu Jerál identifika hodi halo futuru instalasaun mak iha Caicoli, konstrusaun ba Kuartel Jerál PNTL rai iha parte área Farol sei halo Eskuadra PNTL Vera Cruz, atuál Sede PST sei halo ba Eskudra nain Feto, rai iha área Kintal Ki’ik sei sai hanesan futuru instalasaun kazerna PNTL atu sai hela fatin Ofisiál no Sub-Alternu PNTL inklui rai eis Brimob iha Comoro sei sai hanesan futuru instalasaun armajen PNTL.

Jornalista: Natalino Costa      

Editór : Zezito Silva

iklan
iklan

Leave a Reply

iklan
error: Content is protected !!