DILI, 10 jullu 2024 (TATOLI)–Diretór Nasionál Sekundáriu Jerál iha Ministériu Edukasaun (ME), Benjamin Fernandes, hateten, parte ministériu seidauk hasai karta ba dirijente eskola sira atu selu profesór hodi hanorin estudante sira.
“Dirijente sira uza sira-nia osan rasik mak selu profesór sira, to’o agora ami seidauk hetan relátoriu ida tama. Ministériu Edukasaun seidauk hasai karta ba profesór atu selu hodi hanorin estudante, ne’e laiha regra. Ami seidauk hatun despaisu hanesan ne’e, tanba ita hatene katak daudaun ne’e voluntáriu no kontratadu sira la eziste ona iha eskola,” Diretór informa ba Agência Tatoli iha ninia knaar fatin, Vila-Verde, kuarta ne’e.
Maski nune’e, ME liuhusi Diresaun Nasionál Ensinu Sekundáriu Jerál no Tékniku Vokasionál aseita ho inan-aman nia kontribuisaun ba eskola maibé tenke iha akta.
“Karik eskola sira husu inan-aman fó kontribuisaun ne’e laiha problema maibé presiza iha akta reuniaun no inan-aman mak hakarak fó duni, eskola labele obriga tanba Ministériu Edukasaun bandu,” nia akresenta.
Parte Diresaun bele autoriza bainhira eskola hetan difikuldade ruma hodi husu ajuda ba inan-aman.
“Bainhira eskola hetan difikuldade ruma ko’alia ho inan-aman sira aseita iha nível ensinu sekundáriu bele se kuandu sira aseita, maibé imi hatene katak prosesu hotu inan-aman mak kaer. Ministériu Edukasaun bandu eskola mak kaer inan-aman sira-nia osan. Inan-aman rasik mak kaer duni osan hodi jere rezultadu mak entrega ba eskola ne’e bele, maibé ne’e ba ensinu sekundáriu jerál de’it,” nia dehan.
Notísia relevante : Estudante ESG Filiál Ualili Baucau kontribui osan selu profesór voluntáriu
Estudante Departamentu Informátika durante fulan-neen ona laiha profesór atu hanorin matéria. Ho situasaun ne’e, Konsellu Profesór Eskola Ensinu Tékniku Vokasionál Kalo-Heda Uatulari ho inisiativa kontrata profesór na’in-tolu hodi apoiu prosesu apredizajen iha Departamentu Informátika no Teknolojia.
“Ami ho inisiativa bolu fila profesór na’in-tolu hodi hanorin estudante iha Departamentu Infomátika. Durante fulan-neen nia laran laiha profesór hanorin estudante sira. Ha’u ho ha’u-nia Adjuntu Diretór sei foti ami na’in-rua nia osan subsídiu kargu mak selu osan transporte, hanesan mina ba profesór sira. Kada fulan profesór ida hetan $20 to’o fulan-dezembru. Depois to’o fulan-neen ami fó tan osan transporte kada ema $50. Ami sei fa’an eskola nia karau hodi selu profesór inklui seguransa eskola,” Diretór Ensinu Sekundáriu Tékniku Vokasionál Kalo-Heda, postu administrativu Uatulari, munisípiu Viqueque, Zainal Abadin, hateten.
Konsellu Profesór hamosu inisiativa ne’e no halo desizaun ho objetivu atu normaliza prosesu aprendizajen ba estudante Departamentu IT.
“Tuir loloos ami bolu profesór na’in-haat maibé osan limitadu, ne’ebé ami bolu uluk na’in-tolu hodi hanorin matéria eletróniku fundamentál, komunikasaun dadus, instalasaun no manutensaun ekipamenetu informátika, sistema dijitál no arkitetura komputadór, programa microsoft word no sei haree mós prova aptidaun profesionál inklui matéria seluk neʼebé eziste iha departamentu IT,” nia akresenta.
Daudaun ne’e, profesór sira hahú ativa hanorin estudante sira hahú husi segunda, loron 01 jullu 2024 no agora profesór sira kontinua.
“Ha’u fiar katak profesór na’in-tolu neʼebé ami bolu sei fasilita hanorin estudante sira husi klase 1 to’o klase 3 sira, ne’ebé durante aula mamuk. Aleinde ne’e ami mós agradese ba Ministériu Edukasaun tanba profesór Departamentu IT ida horiseik liu bolsa kandidatura profesór hodi reforsa tan hanorin iha Departamentun ne’e,” nia tenik.
Jornalista : Osória Marques
Editora : Julia Chatarina
